ڈالر کے مقابلے روپے کی قدر میں اضافہ

انٹر بینک مارکیٹ میں منگل کو امریکی ڈالر کے مقابلے میں روپے کی قدر میں 0.01 فیصد کا معمولی اضافہ ریکارڈ کیا گیا۔

کاروبار کے اختتام پر مقامی کرنسی کی قیمت 279.27 روپے رہی، جس سے ڈالر کے مقابلے میں روپے کی قدر میں 0.03 روپے کی بہتری دیکھی گئی۔پیر کو مقامی کرنسی کی قیمت 279.30 روپے پر بند ہوئی تھی۔

دوسری جانب منگل کو عالمی مارکیٹ میں تاجر ایران جنگ کی صورتحال کا جائزہ لیتے رہے، جس کے باعث ڈالر کی قیمت میں اتار چڑھاؤ دیکھا گیا جبکہ آسٹریلوی ڈالر کی قدر میں بھی معمولی کمی واقع ہوئی۔ ایشیائی مارکیٹ میں یورو کی قیمت 0.12 فیصد کمی کے ساتھ 1.1492 ڈالر رہی، جبکہ برطانوی پاؤنڈ بھی 0.1 فیصد گراوٹ کے ساتھ 1.33 ڈالر پر آگیا۔ ڈالر انڈیکس معمولی تبدیلی کے ساتھ 99.913 کی سطح پر رہا۔

کئی امریکی اتحادیوں کی جانب سے آبنائے ہرمز میں آئل ٹینکرز کی حفاظت کے لیے بحری جہاز بھیجنے کے امریکی صدر ڈونلڈ ٹرمپ کے مطالبے کو مسترد کیے جانے کے بعد مارکیٹ میں بے چینی پیدا ہوئی ہے۔ اس صورتحال سے توانائی کی برآمدات جلد معمول پر آنے کی امیدوں پر خدشات منڈلا رہے ہیں۔

ایران پر امریکہ اور اسرائیل کی جنگ کی وجہ سے تیل کی قیمتوں میں اضافے نے سرمایہ کاروں کو مہنگائی کے حوالے سے فکر مند کر دیا ہے، جس سے عالمی سطح پر شرح سود کے تناظر میں بڑی تبدیلیاں آئی ہیں۔ اس صورتحال نے بیشتر کرنسیوں کے مقابلے میں امریکی ڈالر کو سہارا دیا ہے۔

مزید برآں منگل کو تیل کی قیمتوں میں 2 فیصد سے زائد کا اضافہ ہوا، جس نے گزشتہ روز کے کچھ نقصانات کا ازالہ کر دیا۔ آبنائے ہرمز کی بندش اور سپلائی کے خدشات کی وجہ سے برینٹ خام تیل کے سودے 2.74 ڈالر یا 2.7 فیصد اضافے کے ساتھ 102.95 ڈالر فی بیرل تک پہنچ گئے جبکہ امریکی ویسٹ ٹیکساس انٹرمیڈیٹ خام تیل کی قیمت 2.45 ڈالر یا 2.6 فیصد اضافے سے 95.95 ڈالر ہو گئی۔