گلاسگو میں ہنگامہ آرائی : سیلٹک کی جیت کے بعد شائقین آپس میں بھڑ گئے، پولیس کی مداخلت اور متعدد گرفتاریاں

اسکاٹ لینڈ کے سب سے بڑے حریفوں کے درمیان کھیلے گئے اولڈ فرم ڈربی کے بعد سیلٹک اور رینجرز کے شائقین بڑی تعداد میں آئی بروکس اسٹیڈیم کی پچ پر اُمڈ آئے اور ایک دوسرے پرفلیئرز(آتشیں مواد) پھینکے، جس سے ناخوشگوار صورتحال پیدا ہوگئی۔

گلاسگو شہر میں رینجرز کے اسٹیڈیم میں 50 ہزار تماشائیوں کے سامنے کھیلے گئے اس میچ میں مقررہ وقت تک کوئی گول نہ ہوسکا ، تاہم سیلٹک نے پنالٹی شوٹ آؤٹ میں 4-2 سے کامیابی حاصل کر کے سکاٹش کپ کے کوارٹر فائنل کے لیے کوالیفائی کر لیا۔

دونوں ٹیموں کے مداحوں جن میں سے کچھ نے چہرے چھپا رکھے تھے کی جانب سے ایک دوسرے پر چیزیں پھینکے جانے کے بعد پولیس اور اسٹیڈیم کے عملے نے نظم و ضبط بحال کرنے کے لیے دونوں گروپوں کے درمیان حفاظتی حصار قائم کیا جبکہ کھلاڑی تیزی سے میدان سے باہر نکل گئے۔

چیف سپرنٹنڈنٹ کیٹ اسٹیفن نے اسکاٹ لینڈ پولیس کی آفیشل ویب سائٹ پر جاری ایک بیان میں اس ”شرمناک“ واقعے کی مذمت کی اور بتایا کہ کئی افراد کو گرفتار کر لیا گیا ہے۔ اسٹیفن کا کہنا تھا کہ اس گھناؤنے مظاہرے میں افسران اور عوام زخمی ہوئے ہیں، میں ڈیوٹی پر موجود تمام افسران اور عملے کا شکریہ ادا کرنا چاہتی ہوں۔

انہوں نے مزید کہا کہ متعدد گرفتاریاں کی جا چکی ہیں اور پولیس اب دونوں کلبوں اور سکاٹش فٹ بال ایسوسی ایشن کے ساتھ مل کر میچ کے اختتام پر پچ پر پیش آنے والے مناظر کی سخت تحقیقات کرے گی۔