ڈالر کے مقابلے روپے کی قدر میں معمولی اضافہ

انٹربینک مارکیٹ میں جمعہ کو بھی ڈالر کے مقابلے روپے کی قدر میں معمولی اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 279.40 پر بند ہوا۔

یاد رہے کہ جمعرات کو مقامی کرنسی 279.41 پر بند ہوئی تھی۔

مزید برآں جمعہ کو ابتدائی ایشیائی تجارت کے دوران امریکی ڈالر کی قدر مجموعی طور پر مستحکم رہی اور یہ ایک سال سے زائد عرصے میں اپنے سب سے بڑے ہفتہ وار اضافے کی جانب گامزن ہے، کیونکہ مشرقِ وسطیٰ میں بڑھتے ہوئے تنازع نے سیف ہیون سمجھے جانے والے اثاثوں کی طلب میں اضافہ کردیا ہے۔

یورو اور ین کی قدر دباؤ کا شکار رہی کیونکہ اس بحران نے تیل کی قیمتوں کو مسلسل اوپر دھکیل دیا ہے جس سے توانائی کی درآمدات پر منحصر معیشتوں میں مہنگائی کے خطرات بڑھ گئے ہیں۔

ڈالر انڈیکس 0.06 فیصد کی معمولی کمی کے ساتھ 99.00 پر ٹریڈ کر رہا تھا تاہم یہ رواں ہفتے اب بھی 1.4 فیصد اضافے کی راہ پر گامزن ہے جو نومبر 2024 کے بعد سے اس کا سب سے بڑا ہفتہ وار اضافہ ہوگا۔

یورو کی قدر 1.1612 ڈالر پر تقریباً مستحکم رہی، جبکہ جاپانی ین کی قدر میں 0.06 فیصد کا معمولی اضافہ ہوا اور وہ 157.5 فی ڈالر کی سطح پر آگیا۔

برطانوی پاؤنڈ کی قدر تقریباً مستحکم رہی اور 0.04 فیصد کے معمولی اضافے کے ساتھ 1.3361 ڈالر پر ٹریڈ ہوئی۔