پاکستان نے سعودی عرب کو ایم-10 موٹروے میں سرمایہ کاری کی دعوت دے دی

سعودی عرب نے پاکستان کے ایم-10 موٹروے منصوبے میں سرمایہ کاری میں دلچسپی ظاہر کی ہے۔ یہ بات وفاقی وزیر برائے مواصلات عبدالعلیم خان کی استنبول میں او آئی سی کانفرنس کے موقع پر سعودی وزیر برائے ٹرانسپورٹ و لاجسٹکس صالح بن ناصر الجاسر سے اعلیٰ سطحی ملاقات کے دوران سامنے آئی ہے۔

ہفتے کے روز جاری کردہ پریس ریلیز کے مطابق ملاقات میں ٹرانسپورٹ، بحری امور اور علاقائی روابط کے شعبوں میں دوطرفہ تعاون کے فروغ پر تبادلہ خیال کیا گیا۔

ملاقات کے دوران عبدالعلیم خان نے سعودی حکومت کو کراچی پورٹ سے حیدرآباد تک نئی الائنمنٹ پر مشتمل ایم-10 موٹروے میں سرمایہ کاری کی باضابطہ دعوت دی۔ انہوں نے اس بات پر زور دیا کہ پاکستان اپنے ٹرانسپورٹ شعبے کی جدیدکاری کے لیے سعودی عرب کے ساتھ پبلک پرائیویٹ پارٹنرشپ ( پی پی پی ) کو فروغ دینے کا خواہاں ہے۔

انہوں نے کہا کہ پاکستان اور سعودی عرب کے درمیان گہرے برادرانہ اور مذہبی تعلقات ہیں، جنہیں مضبوط معاشی اور تجارتی رجحانات کی حمایت حاصل ہے۔ ان کا کہنا تھا کہ پاکستان علاقائی حب بننے کے لیے اپنے زمینی روابط اور تجارتی راہداریوں کو وسعت دینا چاہتا ہے۔ انہوں نے پاکستان کے بحری شعبے میں وسیع سرمایہ کاری کے امکانات کو بھی اجاگر کیا۔

سعودی وزیر نے پاکستان کے مواصلاتی شعبے کی جدیدکاری میں گہری دلچسپی کا اظہار کیا۔ انہوں نے کہا کہ سعودی عرب پاکستان کے لیے فضائی پروازوں میں اضافے کا خواہاں ہے اور اس بات پر زور دیا کہ ڈیجیٹلائزیشن اور روڈ سرویلنس جدید دور کی اہم ضروریات ہیں۔

دریں اثنا، نائب وزیر اعظم اور وزیر خارجہ محمد اسحاق ڈار نے ہفتے کے روز سعودی وزیر خارجہ فیصل بن فرحان السعود سے ٹیلیفون پر گفتگو کی۔

وزارت خارجہ کے بیان کے مطابق دونوں رہنماؤں نے بدلتی ہوئی علاقائی صورتحال اور آئندہ بین الاقوامی مصروفیات پر تبادلہ خیال کیا اور قریبی رابطے میں رہنے پر اتفاق کیا۔