ڈالر کے مقابلے میں روپے کی قدر میں اضافہ

انٹر بینک مارکیٹ میں امریکی ڈالر کے مقابلے میں پاکستانی روپے کی قدر میں معمولی اضافہ دیکھا گیا۔ اسٹیٹ بینک آف پاکستان کے مطابق مقامی کرنسی 0.01 روپے کی بہتری کے بعد 279.66 پر بند ہوئی، جبکہ منگل کو یہ 279.67 پر بند ہوئی تھی۔

دوسری جانب جاپانی ین نے بدھ کو اپنی مضبوط پوزیشن برقرار رکھی کیونکہ سرمایہ کاروں کا ماننا ہے کہ وزیرِ اعظم ثنائے تاکائیچی کی بھاری اکثریت سے انتخابی کامیابی انہیں مزید بہتر مالیاتی پالیسیاں اپنانے میں مدد دے گی۔ ادھر آسٹریلوی ڈالر بھی تین سالوں میں پہلی بار 0.71 ڈالر کی سطح سے اوپر نکل گیا۔

امریکی معیشت میں سست روی کے اشاروں اور نان فارم پے رولز کی اہم رپورٹ سے قبل ڈالر کی قدر میں لرزش دیکھی گئی۔ ڈالر کے مقابلے میں ین 0.4 فیصد اضافے کے ساتھ 153.80 پر پہنچ گیا، جبکہ یورو اور اسٹرلنگ کے مقابلے میں بھی اس کی برتری برقرار رہی۔ جاپان میں تعطیل کے باعث ایشیائی مارکیٹ میں کاروبار کا حجم کم رہا۔

عالمی منڈی میں تیل کی قیمتوں میں بھی اضافہ دیکھنے میں آیا، جس کی وجہ امریکہ اور ایران کے درمیان تناؤ اور بھارت کی جانب سے طلب میں اضافے کے باعث سپلائی کے دباؤ میں کمی ہے۔ برینٹ خام تیل کے سودے 55 سینٹ اضافے کے ساتھ 69.35 ڈالر اور امریکی ویسٹ ٹیکساس انٹرمیڈیٹ 57 سینٹ اضافے کے ساتھ 64.53 ڈالر فی بیرل پر پہنچ گئے۔