بٹ کوائن کی قیمت میں بڑی گراوٹ، 70 ہزار ڈالر کی حد سے نیچے گرنے کے قریب

دنیا کی سب سے بڑی کرپٹو کرنسی کی قیمتوں میں کمی کا سلسلہ تھمنے کا نام نہیں لے رہا، جمعرات کو بٹ کوائن 70 ہزار ڈالر کی سطح سے نیچے گرنے کے دہانے پر پہنچ گیا۔

بٹ کوائن ایشیائی سیشن میں 3 فیصد سے زائد گرکر 70,052.38 ڈالر پر پہنچ گیا جو نومبر 2024 کے بعد اس کی کم ترین سطح ہے۔

دنیا کی دوسری بڑی کرپٹو کرنسی ایتھر بھی اسی طرح تقریباً 2 فیصد کمی کے ساتھ 2,086.11 ڈالر پر آ گئی، اگر اس کی قیمت 2 ہزار ڈالر سے نیچے گرتی ہے تو یہ گزشتہ سال مئی کے بعد پہلا موقع ہوگا۔

کرپٹو کرنسیوں میں حالیہ بڑی مندی انتہائی تیزی اور شدت کے ساتھ آئی ہے جس کے بارے میں تجزیہ کاروں کا کہنا ہے کہ اس کی وجہ کیون وارش کی بطور اگلے فیڈرل ریزرو چیئرمین نامزدگی ہے۔ یہ خدشات ظاہر کیے جا رہے ہیں کہ وہ فیڈرل ریزرو کے بیلنس شیٹ (اثاثوں) میں کمی کرسکتے ہیں۔

بٹ کوائن کی قیمت میں اس ہفتے اب تک 7 فیصد سے زائد کی کمی واقع ہوچکی ہے جس کے بعد اس سال اب تک ہونے والا مجموعی نقصان تقریباً 20 فیصد تک پہنچ گیا ہے۔ دوسری جانب ایتھر کی قیمت میں اس سال اب تک تقریباً 30 فیصد کی گراوٹ دیکھی گئی ہے۔

عام طور پر یہ سمجھا جاتا ہے کہ کرپٹو کرنسیوں کو (فیڈرل ریزرو کی) بڑی بیلنس شیٹ سے فائدہ پہنچتا ہے کیونکہ جب فیڈ مارکیٹ میں نقد رقم فراہم کر کے منی مارکیٹس کو رواں رکھتا ہے تو ان کی قیمتوں میں اضافہ ہوتا رہا ہےجو کہ سٹہ آرائی یا غیر یقینی منافع والے اثاثوں کے لیے ایک اہم سہارا ہے۔