شدید گراوٹ کے بعد مارکیٹ سنبھل گئی، سونے کی قیمت میں 3 فیصد سے زائد اضافہ

سونے کی قیمت میں منگل کے روز 3 فیصد سے زائد اضافہ دیکھنے میں آیا اور یہ گزشتہ سیشن میں لگنے والی تقریباً ایک ماہ کی کم ترین سطح سے سنبھل گیا۔ سرمایہ کار اس ہفتے اہم معاشی اعداد و شمار کی عدم دستیابی کے لیے خود کو تیار کر رہے ہیں کیونکہ امریکہ میں جزوی حکومتی شٹ ڈاؤن جاری ہے۔

اسپاٹ گولڈ 0120 جی ایم ٹی تک 3.7 فیصد اضافے کے ساتھ 4,837.16 ڈالر فی اونس تک پہنچ گیا، جبکہ گزشتہ سیشن میں یہ تقریباً ایک ماہ کی کم ترین سطح کو چھو گیا تھا۔ اس سے قبل جمعرات کو سونے نے 5,594.82 ڈالر فی اونس کی ریکارڈ بلند ترین سطح بھی حاصل کی تھی۔ اپریل ڈیلیوری کے لیے امریکی گولڈ فیوچرز 4.5 فیصد بڑھ کر 4,859.30 ڈالر فی اونس ہو گئے۔

امریکی بیورو آف لیبر اسٹیٹسٹکس نے پیر کو کہا کہ جنوری کی روزگار سے متعلق اہم رپورٹ اس جمعہ کو جاری نہیں کی جائے گی کیونکہ وفاقی حکومت کا جزوی شٹ ڈاؤن جاری ہے۔ یہ شٹ ڈاؤن ہفتے کے روز اس وقت شروع ہوا جب کانگریس لیبر ڈیپارٹمنٹ سمیت کئی سرکاری محکموں کی فنڈنگ کے لیے معاہدہ منظور نہ کر سکی۔ اگرچہ امریکی سینیٹ نے جمعہ کو اخراجاتی پیکیج منظور کر لیا تھا، تاہم ایوانِ نمائندگان اجلاس میں موجود نہیں تھا۔

ایوانِ نمائندگان سے پیر کو اس قانون سازی پر غور متوقع تھا اور حتمی ووٹنگ منگل کو ہونے کی توقع تھی۔ ہاؤس اسپیکر مائیک جانسن نے امید ظاہر کی ہے کہ شٹ ڈاؤن چند دنوں میں ختم ہو جائے گا۔

دوسری جانب مثبت معاشی اشاریوں اور فیڈرل ریزرو کی پالیسی سے متعلق بدلتی توقعات کے باعث ڈالر نے اپنی مضبوطی برقرار رکھی، جس سے شٹ ڈاؤن کے خدشات کا اثر کسی حد تک کم ہو گیا۔ مضبوط ڈالر سونے کو دیگر کرنسی رکھنے والے خریداروں کے لیے مہنگا بنا دیتا ہے۔

سرمایہ کار توقع کر رہے ہیں کہ 2026 میں فیڈرل ریزرو کم از کم دو بار شرح سود میں کمی کر سکتا ہے۔ چونکہ سونا منافع نہ دینے والا اثاثہ ہے، اس لیے کم شرح سود کے ماحول میں اس کی کارکردگی بہتر رہتی ہے۔

پیر کو امریکی صدر ڈونلڈ ٹرمپ نے بھارت کے ساتھ ایک تجارتی معاہدے کا اعلان بھی کیا جس کے تحت بھارتی مصنوعات پر امریکی ٹیرف 50 فیصد سے کم کر کے 18 فیصد کر دیے گئے، جبکہ بھارت نے روسی تیل کی خریداری روکنے اور تجارتی رکاوٹیں کم کرنے پر اتفاق کیا۔

دیگر قیمتی دھاتوں میں اسپاٹ سلور 5.9 فیصد بڑھ کر 84.09 ڈالر فی اونس ہو گیا، جبکہ جمعرات کو اس نے 121.64 ڈالر کی ریکارڈ سطح چھوئی تھی۔ اسپاٹ پلاٹینم 3 فیصد اضافے کے ساتھ 2,183.64 ڈالر فی اونس تک پہنچ گیا، یہ 26 جنوری کو 2,918.80 ڈالر کی ریکارڈ سطح پر گیا تھا، جبکہ پیلاڈیم 2.7 فیصد بڑھ کر 1,765.75 ڈالر فی اونس ہو گیا۔