نیشنل سیونگز اسکیمز: سی ڈی این ایس نے بیشتر اسکیموں پر شرحِ منافع میں کمی کر دی

سینٹرل ڈائریکٹوریٹ آف نیشنل سیونگز (سی ڈی این ایس) نے اپنی قومی بچت کی بیشتر اسکیموں (این ایس ایس) پر منافع کی شرح میں کمی کر دی ہے، جس کا اطلاق 23 جنوری 2026 سے ہو چکا ہے۔

عارف حبیب لمیٹڈ کی جانب سے جاری کردہ اعداد و شمار کے مطابق شارٹ ٹرم اسپیشل سیونگز سرٹیفکیٹس (ایس ٹی ایس سی) پر منافع میں 110 بیسس پوائنٹس کی کمی کی گئی ہے، جس کے بعد یہ شرح 10.68 فیصد سے کم ہو کر 9.58 فیصد پر آگئی ہے، یہ اسکیمز میں سب سے بڑی کمیوں میں سے ایک ہے۔

ڈیفنس سیونگ سرٹیفکیٹ پر شرحِ منافع 64 بیسس پوائنٹس کی کمی کے ساتھ 10.44 فیصد کر دی گئی ہے۔ اسی طرح، ریگولر انکم سرٹیفکیٹ پر منافع 60 بیسس پوائنٹس کم کر کے 10.56 فیصد سے 9.96 فیصد کردیا گیا ہے۔

پنشنرز بینیفٹ اکاؤنٹ، بہبود سیونگز سرٹیفکیٹ اور شہداء فیملی ویلفیئر اکاؤنٹ، ہر ایک پر منافع کی شرح میں 48 بیسس پوائنٹس کی کمی کی گئی ہے جس کے بعد یہ شرح 12.48 فیصد سے کم ہو کر 12 فیصد رہ گئی ہے۔ جبکہ اسپیشل سیونگز سرٹیفکیٹ کی شرح 40 بیسس پوائنٹس کی کٹوتی کے بعد 10.20 فیصد کر دی گئی ہے۔

اس کے برعکس اسپیشل سیونگز اکاؤنٹ میں مثبت رجحان دیکھا گیا جہاں منافع کی شرح میں 20 بیسس پوائنٹس کا نمایاں اضافہ ریکارڈ کیا گیا، جس سے یہ شرح 10.40 فیصد تک پہنچ گئی۔ اس اضافے نے اسے ان چند آلات میں شامل کردیا ہے جن کے منافع میں حالیہ ردوبدل کے بعد اضافہ ہوا ہے۔

مارکیٹ شرکاء اس ہمہ گیر کمی کو کلیدی شرحِ سود میں بتدریج کمی کی توقعات کے عین مطابق دیکھ رہے ہیں، جس کی بنیادی وجوہات مہنگائی میں اعتدال اور بہتر ہوتے ہوئے میکرو اکنامک اشاریے ہیں۔

گزشتہ ماہ، مارکیٹ کی توقعات کے برعکس، اسٹیٹ بینک آف پاکستان کی مانیٹری پالیسی کمیٹی نے پالیسی ریٹ میں 50 بیسس پوائنٹس کی کمی کرتے ہوئے اسے 10.5 فیصد کر دیا۔

نیشنل سیونگز آرگنائزیشن پاکستان کا سب سے بڑا مالیاتی ادارہ ہے، جو 3.4 ٹریلین روپے سے زائد کے پورٹ فولیو کا انتظام سنبھالتا ہے اور ملک بھر میں 12 ریجنل ڈائریکٹوریٹس کے تحت 376 شاخوں کے نیٹ ورک کے ذریعے 40 لاکھ سے زائد صارفین کو خدمات فراہم کرتا ہے۔ سی ڈی این ایس حکومت کو بجٹ کے خسارے کو پورا کرنے اور اہم بنیادی ڈھانچے کے منصوبوں میں مالی مدد فراہم کرنے میں مدد کرتا ہے۔

کاپی رائٹ بزنس ریکارڈر 2026