بی ایم ایل نے مالیاتی تشکیلِ نو مکمل کر لی، منافع اور پائیدار ترقی کے نئے دور کا آغاز

بینک مکرمہ لمیٹڈ (بی ایم ایل) نے اسلام آباد ہائی کورٹ کی منظوری کے بعد اپنے مالیاتی ڈھانچے کی تشکیلِ نو کا عمل کامیابی سے مکمل کر لیا۔ پاکستان اسٹاک ایکسچینج کو جاری نوٹس کے مطابق اس عمل سے بینک کے جمع شدہ نقصانات ختم ہو گئے ہیں، جس کے نتیجے میں اب بینک ایک شفاف بیلنس شیٹ کے ساتھ پائیدار ترقی اور منافع کے نئے دور میں داخل ہو گیا ہے۔

بینک نے واضح کیا کہ یہ قدم کسی مالی بحران کے باعث نہیں بلکہ ترقی کی رفتار تیز کرنے کے لیے اٹھایا گیا ہے، کیونکہ بینک رواں مالی سال کے پہلے نو ماہ میں پہلے ہی خالص منافع ظاہر کر چکا ہے۔

تشکیلِ نو کے بعد بینک کی فی حصص آمدنی (ای پی ایس) میں نمایاں بہتری اور مستقبل میں ڈیویڈنڈ کی بحالی کی توقع ہے۔

اسپانسر نے اب تک 41 ارب روپے کی سرمایہ کاری کی ہے اور ان کا حصہ 86 فیصد سے کم ہو کر 76 فیصد رہ جائے گا، جبکہ بقیہ 10 فیصد حصص اقلیتی شیئر ہولڈرز میں تقسیم کیے جائیں گے۔ 2 فروری 2026 کو شیئر کی قیمت کی ایڈجسٹمنٹ اس طرح کی جائے گی کہ سرمایہ کاروں کی مجموعی مالیت متاثر نہ ہو۔