بابر اعظم نے ٹی ٹوئنٹی میں جوز بٹلر کا سب سے زیادہ نصف سنچریوں کا ریکارڈ برابر کر دیا

پاکستان کے اسٹار بیٹسمین بابر اعظم نے سابق انگلش کپتان جوز بٹلر کا ریکارڈ برابر کر دیا۔ جمعرات کو ڈاک لینڈز اسٹیڈیم میں بگ بیش لیگ (بی بی ایل) 15 کے ایک میچ میں میلبورن رینیگیڈز کے خلاف کھیلتے ہوئے بابر اعظم نے اپنی 97 ویں ٹی ٹوئنٹی نصف سنچری مکمل کی۔

بابر اعظم نے 46 گیندوں پر 58 رنز کی ناقابلِ شکست فاتحانہ اننگز کھیلی، جس میں چار چوکے اور ایک چھکا شامل تھا۔ ان کی اس اننگز کی بدولت سڈنی سکسرز نے 165 رنز کا ہدف 6 وکٹوں کے نقصان پر حاصل کر لیا۔ 31 سالہ بابر اعظم نے یہ سنگ میل اپنے 333 ویں ٹی ٹوئنٹی میچ میں عبور کیا، ان کے ریکارڈ میں 11 سنچریاں بھی شامل ہیں۔

دوسری جانب جوز بٹلر نے 97 نصف سنچریاں 476 میچوں میں 8 سنچریوں کے ساتھ مکمل کی تھیں۔ ٹی ٹوئنٹی کرکٹ میں سب سے زیادہ نصف سنچریوں کا ریکارڈ آسٹریلوی لیجنڈ ڈیوڈ وارنر کے پاس ہے جنہوں نے 428 میچوں میں 113 ففٹیز اسکور کر رکھی ہیں۔

میچ کی تفصیلات کے مطابق میلبورن رینیگیڈز نے پہلے بیٹنگ کرتے ہوئے مقررہ 20 اوورز میں 9 وکٹوں پر 164 رنز بنائے۔اوپنر جوش براؤن نے 19 گیندوں پر 43 رنز کی جارحانہ اننگز کھیلی، جبکہ جیک فریزر میک گرک نے 38 اور حسن خان نے 39 رنز بنائے۔ وکٹ کیپر بیٹر محمد رضوان صرف 6 رنز بنا کر آؤٹ ہو گئے۔ سڈنی سکسرز کی جانب سے شان ایبٹ نے 16 رنز دے کر 3 وکٹیں حاصل کیں، جبکہ جیک ایڈورڈز، بین ڈوارشوئس اور ہیڈن کیر نے دو دو کھلاڑیوں کو آؤٹ کیا۔

165 رنز کے تعاقب میں سڈنی سکسرز نے ہدف 19.1 اوورز میں حاصل کر لیا۔ بابر اعظم نے اننگز کو سنبھالا دیا جبکہ ڈینیل ہیوز نے 30 اور جوئل ڈیوس نے 15 گیندوں پر 34 رنز کی ناقابلِ شکست اننگز کھیل کر ٹیم کو فتح دلائی۔ اس جیت کے ساتھ سڈنی سکسرز بی بی ایل پوائنٹس ٹیبل پر چھٹے نمبر پر آ گئی ہے، جبکہ میلبورن رینیگیڈز ساتویں پوزیشن پر موجود ہے۔