سعودی سفیر کی وزیرِاعظم شہباز شریف سے ملاقات، علاقائی صورتحال پر تبادلۂ خیال

سعودی عرب کے پاکستان میں سفیر نواف بن سعید احمد المالکی نے بدھ کے روز وزیراعظم ہاؤس میں وزیراعظم محمد شہباز شریف سے ملاقات کی، جس میں دونوں ممالک کے دوطرفہ تعلقات کو مزید مضبوط بنانے کے عزم کا اعادہ کیا گیا ہے۔

ملاقات کے دوران وزیراعظم نے خادمِ حرمین شریفین شاہ سلمان بن عبدالعزیز آل سعود اور ولی عہد و وزیراعظم محمد بن سلمان بن عبدالعزیز آل سعود کے لیے نیک تمناؤں اور احترام کا اظہار کیا۔

پاکستان اور سعودی عرب کے تعلقات کی ’’مثالی نوعیت‘‘ پر اطمینان کا اظہار کرتے ہوئے شہباز شریف نے دونوں برادر ممالک کے درمیان طویل عرصے سے قائم قریبی اور برادرانہ تعلقات کو مزید گہرا کرنے کے لیے اپنی حکومت کے عزم کا اعادہ کیا۔

انہوں نے ولی عہد محمد بن سلمان کی مسلسل سرپرستی اور حمایت پر ان کا شکریہ ادا کیا، جس کے باعث ان کے بقول دوطرفہ تعلقات پہلے سے کہیں زیادہ مضبوط ہوئے ہیں۔

وزیراعظم نے سعودی ولی عہد سے اپنی حالیہ ملاقاتوں کا حوالہ دیتے ہوئے انہیں انتہائی مفید قرار دیا اور کہا کہ ان ملاقاتوں نے پاکستان اور سعودی عرب کے تعلقات کو نئی بلندیوں تک پہنچانے میں اہم کردار ادا کیا۔

انہوں نے مشکل اوقات میں پاکستان کے لیے سعودی عرب کی مستقل حمایت اور علاقائی امن و استحکام کے فروغ میں اس کے تعمیری کردار کو بھی سراہا۔

ملاقات کے دوران فریقین نے حالیہ علاقائی اور عالمی پیش رفت پر تبادلۂ خیال کیا، جبکہ وزیراعظم نے امن و استحکام کے لیے مکالمے اور سفارت کاری کی اہمیت پر زور دیا۔

سفیر المالکی نے خادمِ حرمین شریفین شاہ سلمان اور ولی عہد محمد بن سلمان کی جانب سے وزیراعظم کو گرمجوش سلام پہنچائے اور باہمی دلچسپی کے تمام شعبوں میں پاکستان کے ساتھ تعاون کو مزید وسعت دینے کی سعودی عرب کی خواہش کا اعادہ کیا۔