فنڈز کی منظوری، صنعتکاروں نے سندھ حکومت کا اقدام صنعت دوست قرار دے دیا

صنعتکار برادری نے سندھ حکومت کی جانب سے کراچی کے صنعتی علاقوں کے انفرااسٹرکچر کی بحالی کے لیے اربوں روپے کے تاریخی پیکیج کی منظوری پر خیرمقدم کیا ہے۔

سائٹ ایسوسی ایشن آف انڈسٹری کراچی کے سرپرست اعلیٰ زبیر موتی والا، چیف کوآرڈینٹر سلیم پاریکھ اور صدر احمد عظیم علوی نے اس اقدام کو بروقت اور صنعت دوست فیصلہ قرار دیتے ہوئے کہا ہے کہ فنڈز کی فراہمی سے نہ صرف پیداواری سرگرمیوں میں تیزی آئے گی بلکہ ملکی برآمدات اور سرمایہ کاری پر بھی مثبت اثرات مرتب ہوں گے۔

سائٹ ایسوسی ایشن کے سربرست اعلیٰ زبیر موتی والا نے کہا کہ وزیراعلیٰ سندھ سید مراد علی شاہ کا فیصلہ قابلِ تحسین ہے۔ اس سے بزنس کمیونٹی کا اعتماد بحال ہوگا اور سرمایہ کاری میں اضافہ ہوگا۔ سندھ حکومت اور بلدیاتی قیادت نے صنعتوں کے دیرینہ مسائل کے حل کی عملی مثال قائم کی ہے جبکہ شفاف عمل درآمد اور اوور سائٹ کمیٹی کے قیام سے صنعتکاروں کے اعتماد میں مزید اضافہ ہوگا۔

چیف کوآرڈینٹر سلیم پاریکھ نے کہا کہ کراچی کے صنعتی علاقوں کے لیے 9.28 ارب روپے کا پیکیج ایک تاریخی فیصلہ ہے۔ وزیراعلیٰ سندھ نے صنعتی ترقی کو روزگار اور برآمدات سے جوڑ کر درست سمت کا تعین کیا ہے۔ انہوں نے صنعتوں کو مسائل حل کرنے کے حوالے سے صوبائی وزیر صنعت جام اکرام اللہ دھاریجو اور وزیر بلدیات سید ناصر حسین شاہ کے کردار کو سراہتے ہوئے امید ظاہر کی کہ دونوں وزراء آئندہ بھی صنعتکاروں کے ساتھ تعاون جاری رکھیں گے۔

صدر سائٹ ایسوسی ایشن احمد عظیم علوی نے کہا کہ سائٹ ایریا کے لیے 2 ارب روپے کی منظوری صنعتکاروں کے لیے حقیقی ریلیف ہے۔ بنیادی انفرااسٹرکچر کی بحالی سے پیداواری لاگت میں نمایاں کمی آئے گی۔ انہوں نے میئر کراچی اور کمشنر کراچی کی مشاورت سے فنڈز کی منصفانہ تقسیم کو خوش آئند قرار دیا۔