ڈالر کے مقابلے روپیہ مزید تگڑا

انٹربینک مارکیٹ میں پیر کو ڈالر کے مقابلے روپے کی قدر میں اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ ایک پیسے کی بہتری سے 280.41 روپے پر بند ہوا۔

گزشتہ ہفتے بھی امریکی ڈالر کے مقابلے میں روپیہ 10 پیسے یا 0.04 فیصد اضافے سے 280.52 پر بند ہوا تھا۔

عالمی سطح پر امریکی ڈالر پیر کو دو ہفتوں کی فروخت کے بعد مستحکم رہا، اس ایسے ہفتے سے پہلے جس میں متعدد مرکزی بینکوں کے اجلاس ہیں اور جس کی قیادت امریکی فیڈرل ریزرو کر رہا ہے جہاں شرح سود میں کمی تقریباً یقینی سمجھی جارہی ہے تاہم کمیٹی میں اختلافات اسے غیر یقینی صورتحال میں بدل دیتے ہیں۔

بدھ کو متوقع فیڈ کے فیصلے کے علاوہ، آسٹریلیا، برازیل، کینیڈا اور سوئٹزرلینڈ میں بھی مرکزی بینکوں کے پالیسی اجلاس شیڈول ہیں، تاہم فیڈ کے علاوہ دیگر بینکوں کی جانب سے کسی کارروائی کی توقع نہیں کی جارہی۔

یورو جو جون سے نسبتاً محدود رینج میں ٹریڈ کر رہا ہے، 1.1644 ڈالر پر موجود تھا۔ ین جو نومبر میں کمی کے بعد مستحکم ہوا، 155.28 فی ڈالر کی سطح پر ٹریڈ کر رہا تھا۔

ماہرین اقتصادیات توقع کر رہے ہیں کہ فیڈرل ریزرو محتاط انداز میں شرح سود میں کمی کرے گا، جس میں بیان کی زبان، درمیانی پیش گوئیاں اور چیئرمین جیروم پاول کی پریس کانفرنس اس بات کی نشاندہی کرتی ہیں کہ مزید شرح سود میں کمی کے لیے معیار سخت ہوگا۔

اگر یہ اقدام سرمایہ کاروں کو آئندہ سال دو یا تین شرح سود کی کمی کے امکانات کم کرنے پر مجبور کرے تو اس سے امریکی ڈالر کو بھی سہار مل سکتا ہے۔

تیل کی قیمتیں، جو کرنسی کے توازن کا اہم اشارہ ہیں، پیر کو کم ہو گئیں کیونکہ سرمایہ کار یوکرین میں جنگ ختم کرنے کے مذاکرات اور اس ہفتے متوقع امریکی فیڈرل ریزرو کی شرح سود میں کمی پر نظر رکھے ہوئے تھے۔

برینٹ کروڈ فیوچرز 85 سینٹ یا 1.3 فیصد کی کمی کے ساتھ 62.90 ڈالر فی بیرل پر آ گئے، جبکہ امریکی ویسٹ ٹیکساس انٹرمیڈیٹ کروڈ کی قیمت 86 سینٹ یا 1.4 فیصد کمی کے ساتھ 59.22 ڈالر رہی۔

پیر کو انٹر بینک مارکیٹ میں ڈالر کی شرحیں:

قیمت خرید : 280.41 روپے

قیمت فروخت: 280.61 روپے