ڈالر کے مقابلے روپے کی قدر میں معمولی اضافہ

انٹر بینک مارکیٹ میں جمعہ کو بھی امریکی ڈالر کے مقابلے میں پاکستانی روپیہ مضبوط ہوا اور یہ اپنی قدر میں 0.01 فیصد اضافے کے ساتھ بند ہوا۔

کاروبار کے بند ہونے پر مقامی کرنسی 280.52 روپے پر مستحکم رہی، جو ڈالر کے مقابلے میں تین پیسے کا اضافہ ہے۔

یاد رہے کہ جمعرات کو مقامی کرنسی 280.55 روپے پر بند ہوئی تھی۔

عالمی سطح پر جمعہ کو ڈالر اپنی سب سے خراب ہفتہ وار کارکردگی کی جانب بڑھ رہا ہے جو جولائی کے آخر کے بعد سے ہے،کیونکہ تاجروں نے آئندہ ماہ فیڈرل ریزرو کی جانب سے مزید مالی نرمی کی توقعات بڑھا دی تھیں جبکہ امریکی تھینکس گیونگ کی تعطیل کی وجہ سے مارکیٹ میں لیکوڈٹی کم تھی۔

ڈالر انڈیکس آخری بار 0.1 فیصد اضافے سے 99.624 پر ٹریڈ ہوا جس نے 5 دن کی گراوٹ کے بعد کچھ بحالی حاصل کی، اس گراوٹ نے اسے 21 جولائی کے بعد ایک ہفتے کے بدترین نقصان پر دھکیل دیا تھا۔

سی ایم ای گروپ کے فیڈ واچ ٹول کے مطابق امریکی فیڈرل فنڈز فیوچرز میں آئندہ ماہ 10 دسمبر کو ہونے والے فیڈرل ریزرو کی پالیسی میٹنگ میں 25 بیسس پوائنٹ کمی کے امکانات کو 87 فیصد پر پرائس کیا گیا ہے جو ایک ہفتہ قبل 39 فیصد تھے۔

10 سالہ ٹریژری بانڈز کی ییلڈ جمعے کو 0.8 بیسس پوائنٹس اضافے سے 4.0037 فیصد پر رہی جو پانچ دن کی کمی کے بعد بحالی ہے،اس دوران ییلڈ نے مختصر طور پر دو بار 4 فیصد کی حد عبور کی تھی۔

تیل کی قیمتیں، جو کرنسی کی برابری کا ایک اہم اشارہ ہیں، جمعے کے روز زیادہ تبدیلی نہیں دکھائیں کیونکہ سرمایہ کار روس اور یوکرین کے درمیان امن مذاکرات کی پیش رفت اور اتوار کو ہونے والی اوپیک پلس اجلاس کے نتائج پر نظر رکھے ہوئے تھے تاکہ سپلائی میں ممکنہ تبدیلیوں کے اشارے حاصل کر سکیں، جو قیمتوں پر دباؤ ڈال رہی ہیں۔

فرنٹ ماہ برینٹ کروڈ فیوچرز، جو جمعے کو ختم ہو رہی ہیں، عالمی معیاری وقت کے مطابق ایک بج کر 34 منٹ پر کم حجم تجارت میں $63.34 فی بیرل پر مستحکم تھیں، جبکہ جمعرات کو یہ 21 سینٹس کے اضافے کے ساتھ بند ہوئی تھیں۔

زیادہ فعال فروری کنٹریکٹ $62.85 پر تھا، 2 سینٹس کمی کے ساتھ۔

امریکی ویسٹ ٹیکساس انٹرمیڈیٹ کروڈ $59.00 فی بیرل پر تھا، 35 سینٹس یا 0.60 فیصد اضافے کے ساتھ۔ جمعرات کو امریکی تعطیل تھنکس گیونگ کی وجہ سے کوئی سیٹلمنٹ نہیں ہوئی تھی۔

دونوں کنٹریکٹس مسلسل چوتھے ماہ کے لیے خسارے کی جانب جا رہے ہیں، جو 2023 کے بعد سب سے طویل نقصان کی لہر ہے، کیونکہ عالمی سپلائی میں اضافہ قیمتوں پر دباؤ ڈال رہا ہے۔