فیصل آباد کی فیکٹری میں دھماکے سے 15 افراد جاں بحق ، 7 زخمی

فیصل آباد کے ملک پور شہاب ٹاؤن میں جمعرات کو زور دار دھماکے کے نتیجے میں کم از کم 15 افراد ہلاک اور سات زخمی ہو گئے، جس سے ایک عمارت منہدم ہو گئی۔

ریسکیو 1122 کے اہلکاروں نے واقعے کی تصدیق کرتے ہوئے بتایا دھماکہ کیمیائی فیکٹری میں ہوا، جو کبڈی اسٹیڈیم گراؤنڈ کے علاقے میں واقع تھی جس کے نتیجےمیں گیس کے اخراج کے باعث حادثہ پیش آیا۔

حادثے کے مقام کے ساتھ تین دیگر صنعتی یونٹس بھی موجود تھے جن میں یہ فیکٹری واقع تھی۔ تاہم دیگر تین فیکٹریاں گلو، سلیکون اور کڑھائی یونٹس اس وقت بند تھیں۔ دھماکے کے نتیجےمیں 9 قریبی مکانات کو بھی نقصان پہنچا ہے۔

ریسکیو 1122 کے ترجمان کے مطابق ہلاک ہونے والوں میں تین فیکٹری کارکن تھے جبکہ باقی متاثرین مقامی رہائشی تھے۔

ابتدائی معلومات کے مطابق یہ حادثہ گیس کے اخراج سے پیدا ہونے والے اسٹیمَر دھماکے کے باعث ہوا۔

ترجمان نے بتایا کہ کئی افراد کو منہدم ہونے والی عمارت سے زندہ نکالا گیا، تاہم کچھ افراد شدید چوٹوں کے باعث جان بحق ہو گئے۔ زخمیوں اور لاشوں کو اسپتال منتقل کر دیا گیا۔

دوسری جانب پنجاب کی وزیر اعلیٰ مریم نواز شریف نے فیصل آباد کی کیمیائی فیکٹری میں دھماکے کے نتیجے میں قیمتی جانوں کے ضیاع پر افسوس کا اظہار کیا اور جاں بحق ہونے والوں کے اہل خانہ سے تعزیت اور ہمدردی کا اظہار کیا۔

مریم نواز نے فیصل آباد کے کمشنر سے اس واقعے کی رپورٹ بھی طلب کر لی ہے۔

یہ بات قابل ذکر ہے کہ گزشتہ ہفتے حیدرآباد میں ایک پتاخہ سازی کی فیکٹری کے دھماکے میں کم از کم نو افراد ہلاک ہوئے تھے۔