ارشد ندیم نے اسلامی سولیڈیریٹی گیمز میں گولڈ میڈل جیت لیا

پاکستان کے جیوولن تھرو کے سنسیشن اور اولمپک گولڈ میڈلسٹ ارشد ندیم نے مردوں کے جیوولن مقابلے میں اسلامی سولیڈیریٹی گیمز کا گولڈ میڈل کامیابی سے برقرار رکھا۔

ارشد ندیم نے اپنے فائنل کا آغاز ایک مضبوط 75.44 میٹر کے تھرو سے کیا، جس کے فوراً بعد وہ لیڈر بورڈ پر سب سے آگے آگئے۔

ان کی بہترین کوشش دوسرے راؤنڈ میں سامنے آئی جب انہوں نے 83.05 میٹر کا شاندار تھرو کیا، جس نے ان کی پوزیشن کو مستحکم کیا، اس کے بعد انہوں نے 82.48 میٹر کا تھرو بھی کیا۔

بعد کے راؤنڈز میں انہوں نے چوتھے موقع پر 77.06 میٹر کا تھرو کیا، جبکہ پانچویں کوشش کالعدم قرار دی گئی۔ انہوں نے اپنی سیریز کا اختتام 77.98 میٹر کے آخری تھرو کے ساتھ کیا۔

ارشد ندیم نے سوشل میڈیا پر لکھا کہ الحمدللہ، پاکستان کے لیے ایک اور گولڈ میڈل جیت کر خوش ہوں!“

انہوں نے مزید کہا کہ سرجری کے بعد مکمل صحتیابی کے لیے ابھی سخت محنت جاری ہے، لیکن جیتنے کی خواہش برقرار ہے! اگلے مقابلوں میں اور بھی کچھ آنے والا ہے۔

دوسری جانب محمد یاسر نے چھٹی اور آخری کوشش میں 76.04 میٹر کے بہترین تھرو کے ساتھ سلور میڈل حاصل کیا۔

دوسری پوزیشن کے لیے مقابلہ سخت تھا، جہاں نائجیریا کے سیموئل ایڈمز کیور نے پانچویں کوشش میں 76.01 میٹر کا تھرو کیا۔ محمد یاسر نے آخری راؤنڈ میں بہتر کارکردگی دکھاتے ہوئے کیور کو ہرا کر رنر اپ مقام حاصل کیا۔