اسحاق ڈار اور ترک وزیرِ خارجہ کی ملاقات، غزہ بحران پر گفتگو، دوطرفہ تعلقات مزید مستحکم بنانے کے عزم کا اعادہ

ڈپٹی وزیراعظم اور وزیرِ خارجہ سینیٹر محمد اسحاق ڈار نے پیر کے روز استنبول میں غزہ سے متعلق وزارتی اجلاس کے موقع پر ترک وزیرِ خارجہ ہاکان فیدان سے دوطرفہ ملاقات کی ہے۔

ملاقات میں دونوں وزرائے خارجہ نے غزہ کی تازہ صورتحال کا جائزہ لیا اور فلسطین میں پائیدار امن کے قیام کے لیے مشترکہ کوششیں جاری رکھنے کے عزم کا اعادہ کیا۔

دفترِ خارجہ کے مطابق فریقین نے پاکستان اور ترکیہ کے تعلقات میں مثبت پیش رفت پر اطمینان کا اظہار کیا اور سیاسی، معاشی اور دفاعی شعبوں میں تعاون مزید مضبوط بنانے پر اتفاق کیا۔

دونوں رہنماؤں نے علاقائی اور عالمی امور پر پاکستان اور ترکیہ کے مابین قریبی رابطے کی اہمیت پر زور دیا اور برادرانہ تعلقات اور باہمی حمایت کے اس مضبوط رشتے کو مزید مستحکم کرنے کے عزم کا اعادہ کیا جو دونوں ممالک کے تعلقات کی بنیاد ہے۔

اس سے قبل اسحاق ڈار استنبول پہنچے جہاں وہ ترک وزیرِ خارجہ ہاکان فیدان کی میزبانی میں منعقدہ اجلاس میں شرکت کر رہے ہیں، جس میں غزہ کی جاری انسانی صورتحال پر غور کیا جا رہا ہے۔

استنبول پہنچنے پر ان کا استقبال ترکیہ کی وزارتِ خارجہ کے ڈائریکٹر جنرل برائے پروٹوکول، سفیر احمد جمیل میروغلو نے پاکستانی سفارت خانے کے عہدیداروں کے ہمراہ کیا۔

اعلیٰ سطح کے اجلاس میں غزہ کی بگڑتی ہوئی انسانی صورتحال پر توجہ مرکوز کیے جانے اور مسلم ممالک کی جانب سے جنگ بندی اور محصور فلسطینی علاقے تک امداد کی فراہمی کے لیے مشترکہ کوششوں پر غور متوقع ہے۔

یہ دورہ غزہ بحران کے حوالے سے پاکستان کی مسلسل سفارتی کاوشوں اور خطے کی سطح پر مشترکہ ردِعمل کی حمایت کا مظہر ہے تاکہ دشمنی کا خاتمہ اور عام شہریوں کا تحفظ یقینی بنایا جا سکے۔