گورنر فیصل کنڈی نے پی ٹی آئی کے سہیل آفریدی سے خیبر پختونخوا کے وزیراعلیٰ کے عہدے کا حلف لے لیا

خیبر پختونخوا کے گورنر فیصل کریم کنڈی نے بدھ کے روز پاکستان تحریکِ انصاف (پی ٹی آئی) کے رکنِ صوبائی اسمبلی سہیل آفریدی سے صوبے کے وزیرِاعلیٰ کے عہدے کا حلف لیا۔

حلف برداری کی تقریب گورنر ہاؤس پشاور میں ہوئی، جو پشاور ہائی کورٹ (پی ایچ سی) کے اُس حکم کے چند گھنٹے بعد ہوئی، جس میں گورنر فیصل کنڈی کو سہیل آفریدی سے شام چار بجے تک حلف دلانے کی ہدایت دیتے ہوئے اُن کے انتخاب کو ”آئینی“ قرار دیا گیا تھا۔

تقریب کی فوٹیج میں دیکھا گیا کہ بڑی تعداد میں لوگ گورنر اور نئے حلف اٹھانے والے وزیرِاعلیٰ کے گرد جمع تھے، جب کہ سہیل آفریدی نے حلف لینے کے بعد پی ٹی آئی کے بانی عمران خان کی تصویر بلند کی۔

سہیل آفریدی کو پیر کے روز صوبے کا نیا چیف ایگزیکٹو منتخب کیا گیا تھا۔ اسمبلی اجلاس میں اپوزیشن کی واک آؤٹ اور سبکدوش ہونے والے وزیرِاعلیٰ علی امین گنڈاپور کے استعفے سے متعلق غیر یقینی صورتحال نمایاں رہی۔

ایک روز قبل پشاور ہائی کورٹ کے چیف جسٹس ایس ایم عطیق شاہ نے گورنر کو ہدایت دی تھی کہ وہ سہیل آفریدی سے حلف لیں، بصورتِ دیگر آئین کے آرٹیکل 255(2) کے تحت صوبائی اسمبلی کے اسپیکر کو یہ ذمہ داری ادا کرنی ہوگی۔

عدالتی حکم کے بعد گورنر فیصل کریم کنڈی کے ترجمان نے تصدیق کی ہے کہ حلف برداری کی تقریب کے انتظامات کیے جا رہے ہیں، جب کہ پیپلز پارٹی کے چیئرمین بلاول بھٹو زرداری نے بھی گورنر سے کہا کہ وہ اپنی “آئینی اور قانونی ذمہ داری پوری کریں۔”

سہیل آفریدی کا انتخاب اس وقت عمل میں آیا جب علی امین گنڈاپور کے استعفے سے متعلق ابہام پایا جا رہا تھا۔ گورنر نے ابتدائی طور پر استعفیٰ “دستخطوں کے فرق” کے باعث واپس بھیج دیا تھا۔ تاہم پی ٹی آئی کا مؤقف تھا کہ آئین کے مطابق وزیرِاعلیٰ کے استعفے کے لیے گورنر کی منظوری درکار نہیں، لہٰذا پارٹی نے اپوزیشن کے بائیکاٹ کے باوجود انتخابی عمل مکمل کیا۔

پارٹی ذرائع کے مطابق پی ٹی آئی کے بانی عمران خان نے سہیل آفریدی کو کابینہ کی تشکیل کا مکمل اختیار دے دیا ہے، جو منتخب نمائندوں اور ٹکٹ ہولڈرز پر مشتمل ہوگی۔ اسپیکر بابر سلیم سواتی کی زیرِ صدارت پیر کے اجلاس میں آفریدی نے 90 ووٹ حاصل کیے۔