پنجاب ریونیو اتھارٹی کی ٹیکس وصولیوں میں 28 فیصد اضافہ، 66.41 ارب روپے تک جا پہنچیں

پنجاب ریونیو اتھارٹی (پی آر اے) نے شاندار کارکردگی کا مظاہرہ کرتے ہوئے مالی سال 2025-26 کی پہلی سہ ماہی (جولائی تا ستمبر) کے دوران 66.41 ارب روپے کے محصولات جمع کیے۔

پی آر اے کے مطابق یہ رقم گزشتہ مالی سال کی اسی مدت کے دوران جمع ہونے والے 51.98 ارب روپے کے مقابلے میں 28 فیصد زیادہ ہے۔

پی آر اے کی جانب سے فراہم کردہ تفصیلات کے مطابق کل 66.41 ارب روپے میں سے 1.7 ارب روپے صرف انفرااسٹرکچر ڈویلپمنٹ سیس کی مد میں وصول کیے گئے۔ پی آر اے کے مطابق موجودہ مالی سال میں نہ کوئی نیا ٹیکس عائد کیا گیا اور نہ ہی کسی ٹیکس کی شرح میں اضافہ کیا گیا اس کے باوجود ادارے نے شاندار کارکردگی کا مظاہرہ کیا۔

مزید برآں، پی آر اے نے نان رجسٹرڈ کاروبار کے خلاف وسیع کریک ڈاؤن مہم شروع کردی ہے اور اتھارٹی کی انفورسمنٹ ٹیموں کو ہدایت دی گئی ہے کہ وہ سروس فراہم کرنے والوں کو رجسٹریشن کے دائرے میں لانے کے لیے کوششیں تیز کریں۔ فیلڈ ٹیموں کو یہ ذمہ داری سونپی گئی ہے کہ وہ غیر رجسٹرڈ کاروبار کی نشاندہی کریں اور انہیں قواعد کی تعمیل کے لیے نوٹسز جاری کریں۔

پی آر اے کے حکام کا کہنا ہے کہ غیر رجسٹرڈ کاروبار کو رجسٹریشن کے عمل میں شامل کرنے کے لیے ایک آسان اور سادہ طریقہ کار متعارف کرایا گیا ہے تاکہ ان کے لیے سہولت پیدا کی جا سکے۔ قانون کے تحت سروس فراہم کنندگان کے لیے پی آر اے کے ای۔آئی ایم ایس (E-IMS) سسٹم سے منسلک ہونا لازمی قرار دیا گیا ہے۔

اس کے علاوہ ماہانہ بنیادوں پر ٹیکس ریٹرن بروقت جمع کرانا بھی لازمی کر دیا گیا ہے، بصورتِ دیگر بھاری جرمانے اور سزا دی جا سکتی ہے۔ پی آر اے کے اعلیٰ حکام کے مطابق رجسٹریشن مہم کا مقصد ریونیو میں اضافہ اور ٹیکس بیس کو وسعت دینا ہے۔ ان کا کہنا تھا کہ یہ اقدام رجسٹریشن کے عمل میں شفافیت کے فروغ اور معیشت کی دستاویزی شکل کو مضبوط بنانے میں بھی مددگار ثابت ہوگا۔

کاپی رائٹ بزنس ریکارڈر 2025