اسٹاک مارکیٹ: آخری گھنٹوں میں منافع سمیٹنے کا رجحان، 100 انڈیکس 1,400 سے زائد پوائنٹس گرگیا

پاکستان اسٹاک ایکسچینج میں جمعہ کے روز کاروبار کے دوران شدید اتار چڑھاؤ دیکھا گیا جبکہ سرمایہ کاروں نے سیشن کے آخری گھنٹوں میں منافع سمیٹنے کو ترجیح دی۔

مارکیٹ کا آغاز منفی رجحان کے ساتھ ہوا، اور کے ایس ای 100 انڈیکس 2,000 سے زائد پوائنٹس گر کر 162,411.25 کی انٹرا ڈے نچلی سطح تک پہنچ گیا۔ تاہم بعد ازاں نمایاں ریکوری دیکھنے میں آئی اور کے ایس ای 100 انڈیکس انٹرا ڈے کی بلند ترین سطح 165,262.85 تک گیا۔

سیشن کے آخری گھنٹوں میں ایک بار پھر فروخت کے دباؤ کے باعث مارکیٹ نیچے آئی۔ کاروبار کے اختتام پر کے ایس ای 100 انڈیکس 1,432.61 پوائنٹس (0.87 فیصد) کمی کے ساتھ 163,098.19 پوائنٹس پر بند ہوا۔

آٹو موبائل اسمبلرز، کمرشل بینکنگ، فرٹیلائزر اور آئل اینڈ گیس ایکسپلوریشن کے شعبوں میں نمایاں فروخت کا دباؤ دیکھا گیا۔ انڈیکس میں وزن رکھنے والے بڑے اسٹاکس، ماری پیٹرولیم، او جی ڈی سی، پی او ایل، پی پی ایل، پی ایس او، واہ نِک، ایم سی بی، این بی پی اور یو بی ایل، سب کے سب منفی زون میں بند ہوئے۔

ایک اہم پیش رفت کے طور پراسٹیٹ بینک آف پاکستان کے جاری کردہ اعداد و شمار کے مطابق ستمبر 2025 میں بیرون ملک مقیم پاکستانیوں کی ترسیلاتِ زر 3.2 ارب ڈالر رہیں۔ یہ گزشتہ سال اسی عرصے کے 2.9 ارب ڈالر کے مقابلے میں 11.3 فیصد زیادہ ہیں۔ ماہانہ بنیاد پر بھی ترسیلات میں ایک فیصد اضافہ دیکھا گیا جو اگست میں 3.1 ارب ڈالر تھیں۔

مزید برآں کے الیکٹرک کی ملکیت اور مستقبل کی شراکت داری سے متعلق دو اہم مفاہمتی یادداشتوں (ایم او یوز) پر دستخط کیے گئے۔ پہلی یادداشت کے ای ایس پاور لمیٹڈ کے حصص کی خرید و فروخت سے متعلق تھی جبکہ دوسری یادداشت کے الیکٹرک لمیٹڈ اور ٹرائیڈنٹ انرجی لمیٹڈ کے درمیان پاکستان کے توانائی شعبے میں اسٹریٹجک تعاون اور سرمایہ کاری کے مواقع کے فروغ کے لیے طے پائی۔

گزشتہ روز بھی اسٹاک مارکیٹ منفی رجحان پر بند ہوئی جہاں وسیع پیمانے پر فروخت کے دباؤ نے ابتدائی منافع کو ختم کر دیا۔ کے ایس ای-100 انڈیکس 735.94 پوائنٹس (0.45 فیصد) کمی کے بعد 164,530.81 پوائنٹس پر بند ہوا۔

عالمی سطح پر ایشیائی اسٹاک مارکیٹس جمعے کے روز کمزور رجحان کے ساتھ کاروبار کر رہی تھیں جبکہ وال اسٹریٹ میں گراوٹ کے اثرات برقرار رہے۔ اجناس کی منڈیوں میں بھی حالیہ تیزی کے بعد قدرے سست روی دیکھی گئی۔

ماہرین کے مطابق صدر ڈونلڈ ٹرمپ کی اقتصادی پالیسیوں اور ٹیرف پیکیج کے باعث ایشیائی مارکیٹوں میں مصنوعی ذہانت سے وابستہ ٹیکنالوجی ہارڈویئر کی مانگ میں اضافہ ہوا ہے، جس سے خطے کی اسٹاک مارکیٹس نے امریکی مارکیٹس کے مقابلے میں بہتر کارکردگی دکھائی ہے۔

ایم ایس سی آئی کا ایشیا پیسیفک انڈیکس جاپان کے علاوہ 0.2 فیصد کمی سے ٹریڈ کر رہا تھا۔ ہانگ کانگ کی مارکیٹ میں 1.1 فیصد کمی، آسٹریلیا میں 0.1 فیصد کمی، جبکہ جنوبی کوریا کا انڈیکس 1.7 فیصد اضافے کے ساتھ خطے کی سب سے مضبوط مارکیٹ کے طور پر سامنے آیا۔