اے بی ڈی ویلیئرز نے کرکٹ کو سیاست زدہ کرنے پر بھارت کو آڑے ہاتھوں لیا

جنوبی افریقہ کے سابق کپتان اے بی ڈی ویلیئرز نے ایشیا کپ 2025 کے فائنل کے دوران بھارتی کرکٹ ٹیم کے رویے کو منفی قرار دیتے ہوئے کھیل پر سیاست کو حاوی ہونے دینے پرشدید تنقید کی ہے۔

اپنے یوٹیوب چینل پر حالیہ ویڈیو میں ڈی ویلیئرز نے کہا ہے کہ انہیں اس وقت مایوسی ہوئی جب بھارتی کھلاڑیوں نے ایشین کرکٹ کونسل (اے سی سی) کے صدر اور چیئرمین پاکستان کرکٹ بورڈ ( پی سی بی ) محسن نقوی سے ٹرافی وصول کرنے سے انکار کر دیا۔

ڈی ویلیئرز نے کہا کہ بھارتی ٹیم اس بات پر ناخوش تھی کہ ٹرافی کون پیش کر رہا ہے۔ میری رائے میں اس کی کھیل میں کوئی گنجائش نہیں۔ سیاست کو ایک طرف رکھنا چاہیے۔ کھیل، کھیل ہوتا ہے اور اسے اسی جذبے سے کھیلنا چاہیے۔

انہوں نے مزید کہا کہ یہ واقعہ انہیں افسردہ کر گیا، اور اسے ٹورنامنٹ کا ”غیر خوشگوار اختتام“ قرار دیتے ہوئے امید ظاہر کی کہ آئندہ ایسی صورتحال دوبارہ پیش نہیں آئے گی۔

یہ تنازع میچ کے بعد ہونے والی اختتامی تقریب میں اس وقت پیدا ہوا جب بھارتی کھلاڑیوں نے مبینہ طور پر محسن نقوی سے ایشیا کپ کی ٹرافی وصول کرنے سے انکار کر دیا۔

اس سے قبل بھی ٹورنامنٹ کے دوران بھارتی اسکواڈ کو اس وقت تنقید کا سامنا کرنا پڑا جب انہوں نے گروپ مرحلے اور ناک آؤٹ میچز کے بعد پاکستانی کھلاڑیوں سے ہاتھ ملانے سے گریز کیا تھا۔