اسٹیٹ بینک نے الیکٹرک-بائیکس اور الیکٹرک-رکشوں کیلئے بلا سود فنانسنگ اسکیم کا اعلان کر دیا

وفاقی حکومت نے پیر کے روز گرین ٹیکنالوجی کے فروغ کو تیز کرنے کے لیے ‘الیکٹرک بائیکس اور رکشوں/لوڈرز کے لیے کاسٹ شیئرنگ اسکیم کا اعلان کیا ہے۔

اسکیم کی تفصیلات کے مطابق، اس کے تحت مالی سال 2025-26 میں تقریباً 116,000 ای-بائیکس اور 3,170 ای-رکشے/لوڈرز کی فنانسنگ فراہم کی جائے گی، جس کی تفصیلات اسٹیٹ بینک آف پاکستان نے جاری کی ہیں۔

تقسیم دو مراحل میں کی جائے گی۔

اسٹیٹ بینک کے مطابق پہلے مرحلے میں 40,000 ای-بائیکس اور 1,000 ای-رکشے/لوڈرز تقسیم کیے جائیں گے، جبکہ باقی 76,000 ای-بائیکس اور 2,171 ای-رکشے/لوڈرز دوسرے مرحلے میں تقسیم کیے جائیں گے۔

اس کے لیے ایک خاص کوٹا سسٹم بھی ترتیب دیا گیا ہے، جس کے تحت کم از کم 25 فیصد ای-بائیکس خواتین کے لیے مخصوص ہوں گی، جبکہ 10 فیصد تک حصہ کاروباری افراد، بشمول کورئیر اور ڈیلیوری سروسز، کے لیے دستیاب ہوگا۔

رکشوں اور لوڈرز کے معاملے میں، کوٹے کا 30 فیصد حصہ فلیٹ آپریٹرز کے لیے مختص کیا گیا ہے۔

اس اسکیم کے لیے تمام پاکستانی شہری، جن کے پاس درست سی این آئی سی ہو، درخواست دے سکتے ہیں، بشمول گلگت بلتستان اور آزاد جموں و کشمیر کے شہری، تاہم عمر کی حد مقرر ہے۔

اسٹیٹ بینک نے کہا ہے کہ رکشوں/لوڈرز کے لیے، فلیٹ آپریٹرز بھی عام شہریوں کے ساتھ درخواست دینے کے اہل ہوں گے۔ جبکہ فلیٹ آپریٹرز کے لیے اہلیت کے معیار کا تعین اسٹیرنگ کمیٹی کرے گی۔

ای-بائیکس کے لیے عمر کی حد 18 سے 65 سال مقرر کی گئی ہے، جبکہ رکشوں/لوڈرز کے لیے 21 سے 65 سال ہے۔

فنانسنگ کو سستا بنانے کے لیے، حکومت نے ای-بائیکس کے لیے 50,000 روپے اور رکشوں/لوڈرز کے لیے 200,000 روپے تک کی کیپیٹل سبسڈی فراہم کرنے کی پیشکش کی ہے۔ قرضہ 80:20 کے ڈیٹ ٹو ایکویٹی تناسب کے تحت دیا جائے گا، جہاں ایکویٹی حصہ کیپیٹل سبسڈی اور قرض لینے والے کے حصے پر مشتمل ہوگا۔

بطور اصول، پہلے مقررہ کیپیٹل سبسڈی لاگو ہوگی، اور باقی رقم قرض لینے والے سے وصول کی جائے گی۔

اسٹیٹ بینک نے مزید وضاحت کی کہ اگر 20 فیصد ایکویٹی حصہ مکمل طور پر کیپیٹل سبسڈی سے پورا ہو جائے، تو قرض لینے والے کو کوئی رقم ادا کرنے کی ضرورت نہیں ہوگی۔

مزید برآں، قرضہ صارفین کے لیے بغیر سود کے ہوگا، جبکہ حکومت مکمل مارک اپ لاگت برداشت کرے گی۔ ای-بائیکس کے لیے قسطوں کی مدت زیادہ سے زیادہ دو سال ہوگی، جبکہ رکشوں/لوڈرز کے لیے تین سال۔ قرض لینے والے کو صرف اصل رقم اور انشورنس ماہانہ قسطوں میں ادا کرنا ہوگی۔

اسٹیٹ بینک کے مطابق، اسکیم کو ڈیجیٹل لینڈنگ پلیٹ فارم کے ذریعے فراہم کیا جائے گا تاکہ انسانی رابطے کو کم سے کم کیا جا سکے۔ بینک معلومات کے اشتراک کے لیے ڈیجیٹل پلیٹ فارم کے ساتھ مربوط ہوں گے۔

گاڑیوں کے ماڈلز اور وینڈرز کا انتخاب انجینئرنگ ڈیولپمنٹ بورڈ (ای ڈی بی) کرے گا، اور مینوفیکچررز گاڑیوں کی بروقت فراہمی اور بعد از فروخت سروس کے ذمہ دار ہوں گے۔