ورلڈ ایتھلیٹکس چیمپئن شپ، ارشد ندیم اور نیرج چوپڑا آج جیولن تھرو کے فائنل میں مدِ مقابل ہوں گے

پاکستان کے ایتھلیٹ ارشد ندیم آج ٹوکیو، جاپان میں ہونے والی ورلڈ ایتھلیٹکس چیمپئن شپ 2025 کے مردوں کے جیولن تھرو ایونٹ کے فائنل میں ایکشن میں ہوں گے۔

یہ ایونٹ پاکستانی وقت کے مطابق سہ پہر 3 بج کر 23 منٹ پر شروع ہوگا۔

ارشد ندیم سمیت کل 12 کھلاڑی فائنل میں پہنچے ہیں جن میں بھارت کے نیرج چوپڑا بھی شامل ہیں۔ وہ ایتھلیٹس جنہوں نے 84.5 میٹر یا اس سے زائد تھرو کی، وہ براہِ راست فائنل میں پہنچ گئے اور ابتدائی 7 مقامات حاصل کیے۔ باقی پانچ کھلاڑی بہترین تھرو کی بنیاد پر فائنل کے لیے کوالیفائی کر گئے۔

ارشد ندیم نے کوالیفائنگ راؤنڈ میں اپنی تھرو کی ویڈیو شیئر کرتے ہوئے بدھ کو ایکس پر لکھا کہ الحمداللہ! ورلڈ ایتھلیٹکس چیمپئن شپ کے فائنل کے لیے کوالیفائی کر لیا ہے! کل کے فائنل کے لیے تیاری کر رہا ہوں، پاکستانی وقت کے مطابق 3:23 بجے! عاجزانہ درخواست ہے کہ بہترین کارکردگی کے لیے دعاؤں میں یاد رکھیں۔

ارشد ندیم نے جاپان روانگی سے قبل بھی اپنے مداحوں اور حامیوں سے دعاؤں کی اپیل کی تھی۔