سب میرین کیبل کٹنے کے باعث انٹرنیٹ سروسز متاثر ہونے کا خدشہ

پاکستان ٹیلی کمیونیکیشن کمپنی لمیٹڈ (پی ٹی سی ایل) نے ہفتہ کے روز اعلان کیا ہے کہ جدہ، سعودی عرب کے قریب سب میرین کیبل میں خرابی کے باعث ملک میں انٹرنیٹ صارفین کو سروس سست روی کا سامنا کرنا پڑ سکتا ہے۔

پی ٹی سی ایل کے جاری کردہ سرکاری بیان میں کہا گیا ہے کہ یہ خرابی ایس ایم ڈبلیو 4 اور آئی ایم ای ڈبلیو ای سسٹمز کی جزوی بینڈوڈتھ صلاحیت کو متاثر کر رہی ہے۔

کمپنی کے مطابق، اس کے نتیجے میں پاکستان میں انٹرنیٹ صارفین کو مصروف اوقات میں سروس میں کمی کا سامنا ہو سکتا ہے۔

ٹیلی کام آپریٹر نے اپنے صارفین کو یقین دلایا ہے کہ بین الاقوامی پارٹنرز کنیکٹیوٹی بحال کرنے پر ترجیحی بنیادوں پر کام کر رہے ہیں جبکہ مقامی ٹیمیں بھی متبادل بینڈوڈتھ روٹس کا انتظام کر رہی ہیں تاکہ رکاوٹ کو کم سے کم کیا جا سکے۔

پی ٹی سی ایل نے مزید کہا کہ ہم اس وقت آپ کے صبر اور تعاون کے بے حد شکر گزار ہیں۔

واضح رہے کہ سب میرین کیبل میں خرابی، جو بین الاقوامی انٹرنیٹ کنیکٹیوٹی کی ریڑھ کی ہڈی کی حیثیت رکھتی ہے، اکثر عارضی سست روی کا باعث بنتی ہے، بالخصوص ایسے ممالک میں جیسے پاکستان، جہاں ویب ٹریفک کا بڑا انحصار انہی زیرِ سمندر روابط پر ہے۔