ڈالر کے مقابلے روپے کی قدر میں مزید بہتری

انٹربینک مارکیٹ میں بدھ کو بھی ڈالر کی نسبت روپے کی قدر میں بہتری کا سلسلہ جاری رہا۔

کاروبار کے اختتام پر ڈالر کے مقابلے روپیہ ایک پیسےیا0.01 فیصد بہتری سے 281.71 پر بند ہوا۔ یہ مسلسل19واں روز ہے جب روپیہ ڈالر کے مقابلے میں مضبوط ہوا ہے۔

واضح رہے کہ 6 اگست 2025 سے روپیہ امریکی ڈالر کے مقابلے میں 96 پیسے مضبوط ہوچکا ہے۔

یاد رہے کہ منگل کو مقامی کرنسی 281.72 روپے پر بند ہوئی تھی۔

بین الاقوامی منڈیوں میں بدھ کو بھارتی روپیہ بلند سطح پر کھلنے کا امکان ہے، حالانکہ ایشیائی کرنسیوں میں کمی اور محتاط سرمایہ کاری کا رجحان جاری ہے۔ مارکیٹ کے شرکاء کا کہنا ہے کہ قلیل مدتی دباؤ میں کسی حد تک کمی آئی ہے۔

ایک ماہ کے نان ڈیلیوریبل فارورڈ سے ظاہر ہوتا ہے کہ بھارتی روپیہ امریکی ڈالر کے مقابلے 88.04 سے 88.08 کے دائرے میں اوپن ہوگا جو گزشتہ سیشن کے 88.1550 کے مقابلے میں ہے۔

تاجروں کا کہنا ہے کہ 87.95 کی اہم مزاحمتی سطح کو عبور کرنے والا مختصر اضافہ اس بات کا اشارہ دیتا ہے کہ قریبی مدت میں کرنسی پر دباؤ کم ہوگیا ہے۔

تاجر نے بتایا کہ یہ آپٹیمیزم اس وقت پیدا ہوا جب بھارت کے وزیر تجارت نے کہا کہ وہ توقع کرتے ہیں کہ نومبر تک امریکہ-بھارت تجارتی معاہدہ حتمی شکل اختیار کر لے گا۔

یہ بیان اس وقت سامنے آیا جب امریکی صدر ڈونلڈ ٹرمپ نے کہا کہ بھارت نے اپنی ٹیرف صفر تک کم کرنے کی پیشکش کی ہے۔

ڈالر انڈیکس منگل کو 0.66 فیصد بڑھا اور بدھ کو ایشیا میں بھی معمولی اضافہ دیکھا گیا۔ ایشیائی کرنسیاں ڈالر کے مقابلے میں کمزور رہیں۔

ڈالر کی مضبوطی اس وقت سامنے آئی جب امریکی اور یورپی اسٹاک مارکیٹس میں کمی دیکھی گئی اور طویل المدتی یورپی بانڈز کی ییلڈ کئی سال کی بلند ترین سطح تک پہنچ گئی، جس سے سرمایہ کاروں میں مالی صورتحال کے حوالے سے بڑھتی ہوئی تشویش دیکھنے کو ملی۔

کاپی رائٹ بزنس ریکارڈر 2025