پاکستان اور ہواگوان کا برقی گاڑیوں، لتھیم بیٹریز اور ڈرونز میں تعاون پر تبادلہ خیال

وزیرِاعظم کے معاون خصوصی برائے صنعت و پیداوار ہارون اختر خان نے چینی الیکٹرک وہیکل ساز کمپنی ہواگوان کے چیف ایگزیکٹو آفیسر سے ملاقات کی، جس میں برقی گاڑیوں، لتھیم بیٹریز، روبوٹکس اور ڈرون ٹیکنالوجی میں تعاون کے نئے مواقع پر تبادلہ خیال کیا گیا۔

ہارون اختر خان نے وزیراعظم شہباز شریف کے وژن کو اجاگر کرتے ہوئے کہا کہ برقی گاڑیاں مستقبل کی ٹیکنالوجی ہیں اور ان کا فروغ نہ صرف ماحولیاتی تحفظ کے لیے ضروری ہے بلکہ ملک کے تیل کے درآمدی بلوں میں کمی کے لیے بھی اہم ہے۔

انہوں نے لتھیم بیٹریز کی اہمیت پر زور دیتے ہوئے کہا کہ یہ توانائی ذخیرہ کرنے کی صلاحیت میں کلیدی کردار ادا کریں گی اور مستقبل کے توانائی کے منظرنامے میں اہمیت رکھتی ہیں۔

ملاقات کے دوران ہواگوان کے سی ای او نے بتایا کہ کمپنی زرعی مقاصد کے لیے لتھیم بیٹری سے چلنے والے ڈرون بھی تیار کر رہی ہے۔

ہارون اختر خان نے کہا کہ روبوٹکس اور ڈرونز کا استعمال صحت، زراعت اور روزمرہ زندگی کے شعبوں میں عالمی سطح پر بڑھ رہا ہے، اور یہ سیلاب اور دیگر قدرتی آفات کے دوران ریسکیو اور ریلیف آپریشنز میں اہم کردار ادا کر سکتے ہیں۔

انہوں نے بتایا کہ حکومت نے ملک میں برقی گاڑیوں کے فروغ کے لیے اقدامات تیز کر دیے ہیں اور حال ہی میں پاکستان کی نئی توانائی گاڑی (این ای وی) پالیسی 2025-30 بھی متعارف کرائی گئی ہے جس کا مقصد ماحولیاتی بحران کا مؤثر مقابلہ کرنا ہے۔

ہارون اختر خان نے وزیراعظم کے چین کے دورے کو باہمی تعلقات کو مزید مضبوط کرنے والا قرار دیتے ہوئے کہا کہ چین کے ساتھ مشترکہ منصوبے اور بی ٹو بی تعاون اقتصادی شراکت داری میں سنگ میل ثابت ہوں گے۔

انہوں نے مزید کہا کہ یہ دورہ پاکستان کے لیے سرمایہ کاری، کاروباری تعاون اور معاشی ترقی کے نئے مواقع کھولے گا۔