کابینہ نے سرکاری اداروں کیلئے ریگولیٹری اصلاحات پیکج کی منظوری دیدی

ذرائع نے بزنس ریکارڈر کو بتایا ک وفاقی کابینہ نے بدھ کو مختلف سرکاری اداروں میں انتظامی امور میں تبدیلیوں کے لیے ریگولیٹری اصلاحات پیکج کی منظوری دے دی ہے، جس کی سفارش کابینہ کمیٹی برائے ریگولیٹری اصلاحات نے کی تھی۔ ذرائع کے مطابق اس پیکج کا مقصد مختلف محکموں میں لائسنسنگ، سرٹیفکیشن اور منظوری کے عمل کو سہل بنانا اور انہیں ڈیجیٹائز کرنا ہے تاکہ کاروباری برادری کو آسانیاں فراہم کی جا سکیں۔

ایکسائز اینڈ ٹیکسیشن ڈیپارٹمنٹ نے کمیٹی کو بتایا کہ تمباکو فروش لائسنسز کے اجرا اور تجدید کے عمل کو ڈیجیٹائز کرنے کے اقدامات شروع ہو چکے ہیں۔ پروفیشنل ٹیکس سرٹیفکیٹس کے لیے بھی یہی حکمت عملی اپنانے کی ہدایت دی گئی۔ اسی طرح رئیل اسٹیٹ ایجنٹس اور موٹر وہیکل ڈیلرز کے سرٹیفکیٹس کے اجرا کو بھی ڈیجیٹائز کرنے کا فیصلہ کیا گیا۔

اسلام آباد فوڈ اتھارٹی کو فوڈ لائسنسز کے اجرا اور تجدید کے عمل کو سادہ اور ڈیجیٹائز کرنے کی ہدایت دی گئی، جسے 180 دنوں میں مکمل کیا جائے گا۔ اسی اتھارٹی کو 60 دنوں میں ’’کولڈ اسٹوریج اینڈ ویئرہاؤسز‘‘ کے لیے علیحدہ کیٹیگری متعارف کرانے کی بھی ہدایت کی گئی۔

فوڈ ڈیپارٹمنٹ کو ہدایت کی گئی کہ 90 دنوں میں ہول سیل ڈیلرز اور جنرل اسٹورز کے پرمٹ ختم کیے جائیں، جبکہ نئی شوگر اور فلور ملز کے لائسنس ختم کرنے کی تجویز کو محکمے نے مسترد کیا اور کمیٹی نے وضاحت طلب کی۔

انڈسٹریز اینڈ منرلز ڈویلپمنٹ ڈیپارٹمنٹ نے پارٹنرشپ فرمز میں نام، پتے اور تشکیل کی تبدیلیوں کو ڈیجیٹائز کرنے پر اتفاق کیا، جسے 90 دنوں میں مکمل کیا جائے گا۔ لیبر ویلفیئر ڈیپارٹمنٹ نے دکان اور فیکٹری رجسٹریشن ختم کرنے کی مخالفت کی، تاہم دونوں کو ڈیجیٹائز کرنے پر رضا مندی ظاہر کی۔

کمیٹی نے فائر سیفٹی انسپیکشنز کے یکساں معیار کی منظوری دیتے ہوئے 90 دن میں عمل درآمد کا حکم دیا۔ اسی طرح اسلام آباد ایمپلائز سوشل سیکیورٹی انسٹی ٹیوشن کو کاروباری رجسٹریشن کے عمل کو آسان اور ڈیجیٹائز کرنے کی ہدایت دی گئی۔

کیپٹل ڈویلپمنٹ اتھارٹی (سی ڈی اے) کو 90 دنوں میں مختلف لائسنسز اور این او سیز کے عمل کو ڈیجیٹائز کرنے، ہاؤسنگ اسکیموں کے لے آؤٹ پلان اور کمرشل منصوبوں کی منظوری آسان بنانے کا حکم دیا گیا۔ شادی ہالز کے معاملے پر سی ڈی اے کے موقف کو تسلیم کیا گیا، جبکہ صنعتی پلاٹس میں کاروباری تبدیلی کی اجازت کمیٹی نے دے دی۔

میٹروپولیٹن کارپوریشن اسلام آباد (ایم سی آئی) نے ٹیلی کام ٹاور پرمٹس ختم کرنے سے انکار کیا، تاہم کمیٹی نے دیگر اصلاحات پر عمل درآمد کی ہدایت دی۔

یہ پیکج آئندہ مہینوں میں مختلف محکموں کے لائسنسنگ اور منظوری کے نظام کو ڈیجیٹائز کرنے کی سمت ایک بڑا قدم قرار دیا جا رہا ہے۔

کاپی رائٹ بزنس ریکارڈر، 2025