روپیہ مستحکم: ڈالر کے مقابلے میں مسلسل نویں روز قدر میں اضافہ

انٹربینک مارکیٹ میں بدھ کے روز پاکستانی روپے نے امریکی ڈالر کے مقابلے میں قدر میں معمولی مگر مسلسل بہتری کا سلسلہ برقرار رکھا، اور 0.01 روپے اضافے کے ساتھ 281.95 پر بند ہوا۔

یہ روپیہ کی ڈالر کے مقابلے میں مسلسل نویں روز بہتری ہے، جو معیشت میں محتاط استحکام اور زرمبادلہ کی قدر پر دباؤ میں کمی کی علامت سمجھی جا رہی ہے۔

![ ۔ ][1]

منگل کے روز پاکستانی روپیہ انٹربینک مارکیٹ میں 281.96 پر بند ہوا تھا، جب کہ بدھ کو معمولی بہتری کے ساتھ 281.95 پر بند ہوا، یوں روپے کی قدر میں مسلسل نویں دن اضافہ ریکارڈ کیا گیا۔

دوسری جانب، عالمی منڈی میں امریکی ڈالر نے بدھ کو تیسرے مسلسل سیشن میں بھی مضبوطی دکھائی، کیونکہ سرمایہ کار اس ہفتے فیڈرل ریزرو کے سالانہ جیکسن ہول سمپوزیم کا انتظار کر رہے ہیں، جہاں سے مانیٹری پالیسی کے مستقبل کے بارے میں اشارے ملنے کی توقع ہے۔

نیوزی لینڈ کے ڈالر (کیوی) کو اس وقت دھچکا لگا جب ریزرو بینک نے بتایا کہ اُس کی گورننگ بورڈ نے شرحِ سود میں ایک چوتھائی پوائنٹ کمی کا فیصلہ کرنے سے پہلے نصف پوائنٹ کمی پر بھی غور کیا تھا۔ اس اعلان کے بعد نیوزی لینڈ ڈالر 0.9 فیصد تک گر کر 0.5841 امریکی ڈالر پر آ گیا، جو 14 اپریل کے بعد اس کی کم ترین سطح ہے۔

امریکی ڈالر انڈیکس، جو ڈالر کی چھ بڑی عالمی کرنسیوں کے مقابلے میں قدر کو جانچتا ہے، 0.1 فیصد اضافے کے ساتھ 98.438 پر پہنچ گیا، جو 12 اگست کے بعد اس کی بلند ترین سطح ہے۔ رواں ہفتے کے ابتدائی دو دنوں میں اس میں مجموعی طور پر 0.4 فیصد اضافہ ہوا ہے۔

اب مارکیٹ کی تمام نظریں جمعے کو فیڈ چیئرمین جیروم پاول کی تقریر پر مرکوز ہیں، جہاں یہ دیکھا جائے گا کہ آیا وہ اگلے ماہ شرحِ سود میں کمی کی مارکیٹ توقعات کے برعکس کوئی اشارہ دیتے ہیں یا نہیں۔

فی الحال، تاجر شرحِ سود میں کمی کے امکانات کو 84 فیصد تک دیکھ رہے ہیں، اور سال کے اختتام تک مجموعی طور پر 54 بیسز پوائنٹس کی کمی کی توقع کی جا رہی ہے۔

بدھ کے روز عالمی منڈی میں خام تیل کی قیمتوں میں اضافہ ریکارڈ کیا گیا، جس کی وجہ امریکی پیٹرولیم انسٹیٹیوٹ کی جانب سے تیل کے ذخائر میں کمی کی رپورٹ اور یوکرین جنگ کے خاتمے کے لیے جاری مذاکرات پر سرمایہ کاروں کی نظریں جمی ہونا ہے۔ روسی خام تیل پر پابندیاں تاحال برقرار ہیں۔

منگل کو تیل کی قیمتوں میں ایک فیصد سے زائد کمی آئی تھی، کیونکہ جنگ کے خاتمے کے حوالے سے کسی ممکنہ معاہدے کی امید پیدا ہوئی تھی۔ تاہم، امریکی صدر ڈونلڈ ٹرمپ نے اعتراف کیا کہ روسی صدر ولادیمیر پیوٹن شاید معاہدہ کرنے میں دلچسپی نہ رکھتے ہوں۔

بدھ کو بینچ مارک برینٹ کروڈ کے مستقبل کے سودے 71 سینٹ یا 1.1 فیصد اضافے کے ساتھ فی بیرل 66.50 ڈالر پر پہنچ گئے، جب کہ امریکی ویسٹ ٹیکساس انٹرمیڈیٹ (ڈبلیو ٹی آئی) کروڈ کی ستمبر ڈیلیوری کے سودے، جو بدھ کو ختم ہو رہے ہیں، 84 سینٹ یا 1.4 فیصد اضافے کے ساتھ 63.19 ڈالر فی بیرل پر ٹریڈ ہوئے۔

انٹربینک مارکیٹ میں بدھ کو ڈالر کی قیمتیں:

قیمت خرید 281.95 روپے قیمت فروخت 282.15 روپے [1]: https://i.brecorder.com/large/2025/08/20190803e227523.jpg