لیدر کی درآمد و برآمد، حکومت نے قرنطینہ سرٹیفکیٹ کی شرط ختم کرنے کی منظوری دیدی

حکومت نے چمڑے کی درآمد اور برآمد پر ہیلتھ کوارنٹین سرٹیفکیٹ کی شرط ختم کرنے کی منظوری دے دی ہے، جس کا مقصد چمڑے کی صنعت کو سہولت فراہم کرنا اور بین الاقوامی منڈیوں میں اس کی مسابقت بڑھانا ہے۔

وزارت کامرس کی سمری کے مطابق وفاقی حکومت کی درآمد/برآمد کے مرحلے پر نان ٹیرف میژرز (این ٹی ایمز) کو آسان اور کم کرنے کی پالیسی کے تحت وزارتِ تجارت نے عوامی شعبے کے اسٹیک ہولڈرز بشمول وزارتوں/ڈویژنز اور ریگولیٹرز سے مشاورت کی۔

اس مقصد کے لیے امپورٹ پالیسی آرڈر/ایکسپورٹ پالیسی آرڈر (2022) میں شامل ریگولیٹری تقاضوں پر تجاویز طلب کی گئیں تاکہ کاروباری لاگت کو کم کیا جا سکے۔

اس کے جواب میں وزارتِ قومی غذائی تحفظ و تحقیق نے جانوروں کے قرنطینہ ڈپارٹمنٹ (اے کیو ڈی) کی جانب سے چمڑے کی مصنوعات کی درآمد/برآمد پر ہیلتھ سرٹیفکیٹ کی شرط ختم کرنے کی سفارش کی۔ یہ سہولت متعلقہ پی سی ٹی کوڈز یعنی ایکسپورٹ پالیسی آرڈر 2022 کے ایپنڈکس-جی کی شق 18 اور امپورٹ پالیسی آرڈر 2022 کے پارٹ- تھری، ایپنڈکس-بی کے کوڈ 18 کے تحت فراہم کی جائے گی۔

فی الحال، مخصوص پی سی ٹی کوڈز کے لیے ایکسپورٹ پالیسی آرڈر 2022 کے سیریل نمبر 174، 175، 181-186 اور 189-198 کے مطابق اے کیو ڈی کا ہیلتھ سرٹیفکیٹ درکار ہے۔ اسی طرح امپورٹ پالیسی آرڈر 2022 کے پارٹ-تھری، ایپنڈکس کے سیریل نمبر 445، 447، 453 اور 468 کے مطابق درآمدات کے لیے بھی اے کیو ڈی کا ریلیز آرڈر لازمی ہے۔

وزارتِ قومی غذائی تحفظ و تحقیق کے مطابق جانوروں کے قرنطینہ ڈپارٹمنٹ اور پاکستان ٹینرز ایسوسی ایشن (پی ٹی اے) کے درمیان ایک اجلاس ہوا، جس میں آئی پی او اور ای پی او سے نکالنے کے لیے ایچ ایس کوڈز کی حتمی فہرست اور دیگر امور پر غور کیا گیا۔ اجلاس میں باہمی اتفاق رائے سے طے پایا کہ وزارت کے 15 مئی 2025 کے خط کے ذریعے پہلے سے فراہم کردہ ایچ ایس کوڈز کے علاوہ پِکلڈ چمڑے کے زمرے میں شامل درج ذیل دو ایچ ایس کوڈز کو بھی آئی پی او اور ای پی او سے نکالنے کی سفارش کی جائے: (i) 4102.2110 – پِکلڈ بھیڑ کے بچے کی کھالیں (ii) 4102.2120 – پِکلڈ بھیڑ کی کھالیں

وزارتِ قومی غذائی تحفظ و تحقیق نے وزارتِ تجارت سے درخواست کی کہ وہ ان ایچ ایس کوڈز کو امپورٹ اور ایکسپورٹ پالیسی آرڈرز سے نکالنے کے لیے درکار ترامیم کی سمری آگے بڑھائے تاکہ انہیں جانوروں کے قرنطینہ ڈپارٹمنٹ کی ریگولیٹری نگرانی سے مستثنیٰ کیا جا سکے۔

کاپی رائٹ بزنس ریکارڈر، 2025