امریکی ڈالر کے مقابلے میں روپے کی قدر میں بہتری کا تسلسل جاری

انٹربینک مارکیٹ میں بدھ کو امریکی ڈالر کے مقابلے میں روپے کی قدر میں بہتری کا سلسلہ جاری ہے اور اس میں مزید 0.07 فیصد اضافہ ہوا ہے۔

کاروباری دن کے اختتام پر ڈالر کے مقابلے روپیہ 282.22 روپے پر بند ہوا، جس میں 20 پیسے کا اضافہ ریکارڈ کیا گیا۔

یاد رہے کہ منگل کو ڈالر کے مقابلے روپیہ 282.42 پر بند ہوا تھا۔

بین الاقوامی سطح پر بدھ کو امریکی ڈالر کمزور ہوگیا کیونکہ امریکہ میں مہنگائی کی کمزور شرح نے اگلے ماہ فیڈرل ریزرو کی جانب سے شرح سود میں کمی کی توقعات کو تقویت دی جبکہ صدر ڈونلڈ ٹرمپ کی امریکی اداروں پر اپنی گرفت مضبوط کرنے کی کوششوں نے بھی کرنسی کو کمزور کرنے میں کردار ادا کیا۔

امریکہ میں جولائی کے دوران صارفین کی قیمتوں میں معمولی اضافہ ہوا، منگل کو جاری اعداد و شمار کے مطابق، جو اندازوں کے عین مطابق تھا اور اس سے ظاہر ہوتا ہے کہ ٹرمپ کے وسیع ٹیرف کا اثر اشیاء کی قیمتوں تک فی الحال محدود رہا ہے۔

سرمایہ کاروں نے فیڈ کی ممکنہ شرح سود میں کمی کے امکان پر خوشی کا اظہار کیا اور آئندہ ماہ مرکزی بینک کے اقدامات کے 98 فیصد امکان کو قیمتوں میں شامل کیا، جس سے ڈالر پر دباؤ بڑھ گیا۔

ین کے مقابلے میں ڈالر آخری بار 0.05 فیصد کمی کے ساتھ 147.76 پر تھا، جبکہ یورو مستحکم رہا اور گزشتہ سیشن میں 0.5 فیصد اضافے کے بعد \ 1.1676 ڈالر پر ٹریڈ ہو رہا تھا۔

ڈالر انڈیکس منگل کو تقریباً 0.5 فیصد کمی کے بعد بدھ کی صبح 98.08 پر ریکارڈ کیا گیا۔

شرح سود میں کمی کی توقعات بڑھنے سے امریکی ٹریژری ییلڈز بھی گر گئیں۔ دو سالہ ییلڈ منگل کو تقریباً 10 بیسس پوائنٹس کے اتار چڑھاؤ کے بعد آخری بار 3.7371 فیصد پر ریکارڈ کی گئی، جبکہ بینچ مارک 10 سالہ ییلڈ معمولی تبدیلی کے ساتھ 4.2965 فیصد پر برقرار رہی۔

عالمی منڈی میں بدھ کے روز تیل کی قیمتوں میں معمولی تبدیلی دیکھی گئی جبکہ گزشتہ سیشن میں کمی کے بعد مارکیٹ میں استحکام نظر آیا۔ اس کی بنیادی وجہ ایک انڈسٹری رپورٹ تھی جس کے مطابق گزشتہ ہفتے امریکہ میں خام تیل کے ذخائر میں اضافہ ہوا ہے، جو اس بات کی نشاندہی کرتا ہے کہ موسمِ گرما کی موسمی طلب کا اختتام قریب ہے۔

برینٹ خام تیل کے سودے 3 سینٹ اضافے کے ساتھ 66.15 ڈالر فی بیرل پر پہنچے (0102 عالمی وقت کے مطابق) جبکہ گزشتہ سیشن میں ان کی قیمت میں 0.8 فیصد کمی واقع ہوئی تھی۔

ادھر امریکی ویسٹ ٹیکساس انٹرمیڈیٹ ( ڈبلیو ٹی آئی) خام تیل کے سودے 3 سینٹ کمی کے ساتھ 63.14 ڈالر فی بیرل پر آ گئے جبکہ گزشتہ سیشن میں ان میں 1.2 فیصد کمی ریکارڈ کی گئی تھی۔

انٹر بینک مارکیٹ میں بدھ کے روز ڈالر کے نرخ

قیمت خرید 282.22 روپے قیمت فروخت 282.42 روپے