پاکستان کا بی ایل اے اور مجید بریگیڈ کو بلیک لسٹ کرنے پر امریکی اقدام کا خیرمقدم

پاکستان نے امریکہ کے اس فیصلے کا خیرمقدم کیا ہے جس کے تحت بلوچ لبریشن آرمی (بی ایل اے) اور مجید بریگیڈ کو غیر ملکی دہشت گرد تنظیموں کی فہرست میں شامل کیا گیا ہے، جبکہ مجید بریگیڈ کو بی ایل اے سے منسلک بھی قرار دیا گیا ہے۔

منگل کو جاری کیے گئے ایک بیان میں وزارتِ خارجہ نے کہا کہ پاکستان نے 18 جولائی 2024 سے مجید بریگیڈ کو دہشت گرد تنظیم قرار دے رکھا ہے۔ بی ایل اے اور مجید بریگیڈ پاکستان میں متعدد دہشت گرد حملوں میں ملوث ہیں، جن میں جعفر ایکسپریس کا ہولناک دہشت گرد واقعہ اور خضدار بس حملہ شامل ہیں، جن میں کئی قیمتی جانوں کا ضیاع ہوا۔

ترجمان دفترِ خارجہ کے بیان میں کہا گیا ہے کہ پاکستان دہشت گردی کے خلاف ثابت قدم ہے۔

بیان میں مزید کہا گیا کہ ہماری قربانیوں نے نہ صرف ملک بلکہ خطے کے استحکام اور عالمی سلامتی کے لیے بھی انسدادِ دہشت گردی میں اہم کامیابیاں حاصل کی ہیں۔

پاکستان نے اس عزم کا بھی اظہار کیا کہ وہ اپنے شہریوں کے تحفظ اور ہر قسم اور ہر شکل کی دہشت گردی کے خاتمے کے لیے پرعزم ہے اور اس مشترکہ چیلنج سے نمٹنے کے لیے بین الاقوامی برادری کے ساتھ تعاون جاری رکھے گا۔