پی ای اے کا ای کامرس اور ڈیجیٹل ادائیگیوں کیلئے ٹیکس چھوٹ کا مطالبہ

پاکستان ای کامرس ایسوسی ایشن (پی ای اے) نے حکومت سے مطالبہ کیا ہے کہ وہ مقامی ای کامرس سیکٹر اور ڈیجیٹل ادائیگیوں پر ٹیکس کے بوجھ کو کم کرے تاکہ آن لائن فروخت کنندگان اور ڈومیسٹک خریداری کے پلیٹ فارمز کے لیے غیر ملکی مارکیٹ پلیسز کے مقابلے میں مساوی مواقع فراہم کیے جاسکیں۔

صنعتی اندازوں کے مطابق، پاکستان میں 12 ہزار سے زائد بڑے ای کامرس پلیئرز اور دو لاکھ سے زائد چھوٹے اور درمیانے درجے کے آپریٹرز کاروبار کررہے ہیں، جو براہِ راست یا بالواسطہ طور پر 500,000 سے زیادہ افراد کو روزگار فراہم کرتے ہیں۔

پی ای اے کے چیئرمین عمر مبین نے کہا کہ اضافی حکومتی ٹیکسز کا نفاذ پورے ای کامرس ماحولیاتی نظام پر منفی اثر ڈال رہا ہے جس میں لاجسٹکس کمپنیز، متعلقہ شعبے اور مجموعی کاروباری سرگرمیاں شامل ہیں۔

انہوں نے کہا کہ ٹیکس میں عدم مساوات کی وجہ سے نہ صرف مقامی کاروبار کی ترقی رک گئی ہے بلکہ بہت سے چھوٹے اور درمیانے درجے کے کاروبار (ایس ایم ایز) اور خواتین کاروباری حضرات بھی اپنے کاروبار بند کرنے پر مجبور ہو رہے ہیں۔

ایسوسی ایشن نے حکومت سے مطالبہ کیا کہ ای کامرس سیکٹر کو ٹیکس میں چھوٹ دی جائے اور یہ نشاندہی کی ہے کہ بڑی مقامی کمپنیاں پہلے ہی آمدنی اور سیلز ٹیکس کی قابلِ ذکر ادائیگیاں کر رہی ہیں۔ عمر مبین نے کہا کہ ٹیکس میں اضافے سے نہ صرف مقامی کاروباری اداروں کی مسابقت متاثر ہوگی بلکہ مقامی ای کامرس کمپنیوں کی فروخت پر بھی منفی اثر پڑے گا۔

وفاقی بجٹ 2025-26 میں حکومت نے مقامی ای کامرس کمپنیوں پر مختلف شرح سے نئے ٹیکسز عائد کیے، جن میں 18 فیصد جی ایس ٹی اور 0.25 فیصد سے 2 فیصد تک کی کیش آن ڈلیوری اور ڈیجیٹل ادائیگیوں پر ٹیکس شامل ہیں۔

حکومت نے اسی طرح بین الاقوامی آن لائن پلیٹ فارمز پر 5 فیصد یکساں ٹیکس عائد کیا تھا لیکن بعد میں اسے واپس لے لیا گیا۔ دوسری جانب، مقامی ای کامرس پلیٹ فارمز پر ٹیکسز برقرار رکھے گئے۔

پاکستان ای کامرس ایسوسی ایشن کے کراچی چیپٹر کے صدر شعیب بھٹی نے کہا کہ یہ سیکٹر ٹیکس معافی کا مطالبہ نہیں کررہا بلکہ کیش آن ڈیلیوری اور ڈیجیٹل ادائیگیوں دونوں پر 0.25 فیصد کی یکساں شرح کا مطالبہ رکھتا ہے۔

انہوں نے کہا کہ غیر ملکی ای کامرس پلیٹ فارمز پر ٹیکسز کی معطلی سے ملک سے غیر ملکی زر مبادلہ کا اخراج جاری رہے گا، جبکہ مقامی ای کامرس کمپنیاں کاروباری سرگرمیاں پیدا کرتی ہیں اور ملکی معیشت میں روزگار کے مواقع فراہم کرتی ہیں۔

انہوں نے مزید کہا کہ جب پاکستان کو اپنی ڈیجیٹل معیشت کو وسعت دینے اور نوجوانوں کے لیے مواقع پیدا کرنے کی ضرورت ہے، ایسے واپس مڑنے والے ٹیکس اقدامات صرف کاروباری حضرات کو کاروبار سے باہر دھکیلیں گے۔ ہم حکومت سے سختی سے مطالبہ کرتے ہیں کہ وہ معیشت کے تمام شعبوں کے لیے، چاہے کیش آن ڈیلیوری ہو یا ڈیجیٹل، مساوی مواقع فراہم کرے بجائے اس کے کہ آن لائن کاروبار کو روکا جائے۔

کاپی رائٹ بزنس ریکارڈر 2025