امریکی کرنسی کے مقابلے روپے کی قدر میں مزید اضافہ

انٹر بینک مارکیٹ میں پیر کے روز پاکستانی روپے نے امریکی ڈالر کے مقابلے میں اپنی بہتری کا سلسلہ جاری رکھتے ہوئے 0.01 فیصد اضافہ ریکارڈ کیا۔

کاروبار کے اختتام پر ڈالر کے مقابلے روپیہ 2 پیسے کے اضافے کے ساتھ 282.45 روپے پر بند ہوا۔

گزشتہ ہفتے انٹر بینک مارکیٹ میں ڈالر کے مقابلے میں روپیہ 25 پیسے یا 0.09 فیصد کی بہتری سے 282.47 روپے پر بند ہوا تھا۔

بین الاقوامی سطح پر ڈالر نے گزشتہ ہفتے کے نقصانات کے بعد پیر کو استحکام حاصل کیا کیونکہ مارکیٹیں منگل کو جاری ہونے والی جولائی کی اہم امریکی سی پی آئی رپورٹ کی منتظر ہیں اور زیادہ ٹیرف کے نفاذ سے بچنے کی آخری تاریخ سے قبل واشنگٹن اور بیجنگ کے درمیان تجارتی مذاکرات کی پیش رفت پر توجہ مرکوز کیے ہوئے ہیں۔

ڈالر انڈیکس گزشتہ ہفتے 0.4 فیصد کی کمی کے بعد پیر کو 98.25 پوائنٹس پر مستحکم رہا۔

ین کے مقابلے میں امریکی ڈالر 147.685 ین پر بغیر کسی تبدیلی کے برقرار رہا، کیونکہ جاپانی مارکیٹیں ”ماؤنٹین ڈے“ کی تعطیل کے باعث بند تھیں۔

تجارتی مذاکرات پر توجہ مرکوز رہی کیونکہ امریکہ اور چین کے درمیان معاہدے کے لیے ٹرمپ کی 12 اگست کی آخری تاریخ قریب آ گئی ہے۔

امریکہ اور چین ایک ایسے معاہدے کو حتمی شکل دینے کی کوشش میں ہیں جس سے ایک دوسرے کی مصنوعات پر تین ہندسوں والے ٹیرف کے نفاذ سے بچا جا سکے۔ فنانشل ٹائمز نے اتوار کو اطلاع دی کہ چِپ بنانے والی کمپنیوں این ویڈیا اور اے ایم ڈی نے سیمی کنڈکٹرز کی برآمدی لائسنس حاصل کرنے کے لیے ایک انتظام کے تحت چین میں اپنی فروخت سے حاصل ہونے والی آمدنی کا 15 فیصد امریکی حکومت کو دینے پر اتفاق کیا ہے۔

یہ خبر اس انتباہ کے بعد سامنے آئی ہے کہ این ویڈیا کے H20 چِپس چین کے لیے سیکیورٹی خدشات پیدا کرتے ہیں۔

عالمی منڈی میں پیر کے روز تیل کی قیمتوں میں کمی کا سلسلہ جاری رہا، جو گزشتہ ہفتے 4 فیصد سے زائد کی گراوٹ کے بعد بھی برقرار ہے۔ سرمایہ کاروں کی نظریں اس ہفتے کے آخر میں یوکرین جنگ کے حوالے سے امریکہ اور روس کے درمیان ہونے والی بات چیت پر مرکوز ہیں۔

برینٹ خام تیل کے سودے 45 سینٹ یا 0.68 فیصد کمی کے ساتھ 66.14 ڈالر فی بیرل پر آ گئے، جب کہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت 49 سینٹ یا 0.77 فیصد کمی کے بعد 63.39 ڈالر فی بیرل ہو گئی (عالمی وقت کے مطابق صبح 08:26 تک)۔