پاکستان نیشنل شپنگ کارپوریشن کا چینی کمپنی کے ساتھ سرمایہ کاری کیلئے معاہدہ

پاکستان نیشنل شپنگ کارپوریشن (پی ایم ایس سی) نے چین کی شینڈونگ شِنشو گروپ کارپوریشن کے ساتھ ایک غیر حتمی میمورنڈم آف انڈراسٹینڈنگ (ایم او یو) پر دستخط کیے ہیں تاکہ بحری شعبے اور بین الاقوامی شپنگ سیکٹرز میں سرمایہ کاری اور کاروباری مواقع تلاش کیے جا سکیں۔

کمپنی نے یہ پیشرفت جمعرات کو پاکستان اسٹاک ایکسچینج (پی ایس ایکس) کو دی گئی اطلاع میں ظاہر کی۔

نوٹس میں کہا گیا کہ “پی این ایس سی نے شینڈونگ شِنشو گروپ کارپوریشن کمپنی (جو چین کے قوانین کے تحت قائم اور موجود ہے) کے ساتھ 12 مہینوں کے لیے ایک غیر کمٹمنٹ ایم او یو پر دستخط کیے ہیں۔

یہ ایم او یو فریقین کے درمیان باہمی تعاون اور اعتماد کا رشتہ قائم کرتا ہے تاکہ دونوں کو تجارتی فوائد حاصل ہوں، پاکستان کے بحری شعبے میں سرمایہ کاری کے لیے سازگار حالات پیدا کیے جائیں، اور بین الاقوامی شپنگ سیکٹرز میں باہمی دلچسپی کے کاروباری مواقع تلاش کیے جائیں۔

شینڈونگ شِنشو گروپ چین کے صوبہ شینڈونگ میں واقع ہے اور بیٹری اور فورک لفٹ صنعتوں میں کمپنیوں کو مصنوعات فراہم کرتا ہے۔

دوسری جانب، پی این ایس سی پاکستان کی قومی پرچم بردار شپنگ کمپنی ہے، جو بنیادی طور پر خشک اور مائع کارگو کی دنیا بھر میں ترسیل میں مصروف ہے۔

یہ کمپنی 1979 میں نیشنل شپنگ کارپوریشن (این ایس سی) اور پاکستان شپنگ کارپوریشن کے انضمام سے قائم ہوئی تھی اور وزارت بحری امور، حکومتِ پاکستان کے تحت کام کرتی ہے۔

گزشتہ ماہ، وفاقی وزیر برائے بحری امور محمد جنید انور چوہدری کی زیر صدارت ایک اعلیٰ سطح اجلاس میں اعلان کیا گیا تھا کہ پی این ایس سی اگلے تین سالوں میں اپنے کارگو بیڑے کو 34 جہازوں تک بڑھا کر تقریباً 700 ملین ڈالر کی فریٹ آمدنی حاصل کرنے کی توقع رکھتی ہے۔

فی الحال، پی این ایس سی ملک کے کارگو کا تقریباً 11 فیصد حجم اور 4 فیصد مالیت سنبھالتی ہے۔ تاہم، قومی پرچم بردار کمپنی آئندہ تین سالوں میں (کنٹینرائزڈ کارگو کے علاوہ) کارگو ہینڈلنگ کو حجم کے اعتبار سے 52 فیصد اور مالیت کے اعتبار سے 43 فیصد تک بڑھانے کا ہدف رکھتی ہے۔