پاکستان نے 3 سے 5 لاکھ میٹرک ٹن چینی کی خریداری کیلئے ٹینڈر جاری کردیا

یورپی تجارتی ذرائع نے جمعہ کے روز بتایا کہ پاکستان کی سرکاری ایجنسی ٹریڈنگ کارپوریشن آف پاکستان (ٹی سی پی) نے 3,00,000 سے 5,00,000 میٹرک ٹن سفید ریفائنڈ چینی کی خریداری اور درآمد کے لیے ایک بین الاقوامی ٹینڈر جاری کر دیا ہے۔

ٹینڈر کے تحت قیمتوں کی پیشکش جمع کروانے کی آخری تاریخ 18 جولائی مقرر کی گئی ہے۔ اس سے قبل 8 جولائی کو حکومت پاکستان نے چینی کی قیمتوں میں استحکام لانے کے لیے 5,00,000 ٹن چینی درآمد کرنے کی منظوری دی تھی۔

مارکیٹ تجزیہ کاروں کے مطابق، ملک میں ریٹیل سطح پر چینی کی قیمتیں جنوری سے نمایاں طور پر بڑھ چکی ہیں۔

ٹینڈر میں دنیا بھر سے چینی کی فراہمی طلب کی گئی ہے، جو تھیلوں میں پیک ہو اور کم از کم 25,000 ٹن کی پیشکش کی اجازت دی گئی ہے۔

تاجروں کے مطابق، ٹی سی پی کو یہ اختیار حاصل ہے کہ وہ ٹینڈر کی مقررہ مقدار سے کم یا زیادہ خریداری کر سکتی ہے۔ چینی کی ترسیل اگست کے دوران متعدد کھیپوں میں طلب کی گئی ہے۔

تمام خریدی گئی چینی کی مقدار کو 30 ستمبر تک پاکستان پہنچنا لازمی ہو گا۔