امریکی کرنسی کے مقابلے روپے کی قدر میں کمی ریکارڈ

انٹربینک مارکیٹ میں پیر کو ڈالر کے مقابلے روپے کی قدر میں 0.02 فیصد کی کمی ریکارڈ کی گئی۔

کاروبار کے اختتام پر ڈالر کے مقابلے روپیہ 4 پیسے کی تنزلی سے 283.76 پر بند ہوا۔

یاد رہے کہ گزشتہ روز ڈالر کے مقابلے روپیہ 2 پیسے کی تنزلی سے 283.72 روپے پر بند ہوا تھا۔

عالمی سطح پر امریکی ڈالر یورو کے مقابلے میں تقریباً 4 سال کی کم ترین سطح کے قریب رہا کیونکہ امریکی تجارتی معاہدوں کے حوالے سے منڈی میں پائی جانے والی امید نے فیڈرل ریزرو کی جانب سے شرح سود میں جلد کٹوتی کی توقعات کو مزید تقویت دی۔

امریکی ڈالر برطانوی پاؤنڈ کے مقابلے میں بھی تقریباً چار سال کی کم ترین سطح کے قریب رہا، جبکہ سوئس فرانک کے مقابلے میں ایک دہائی سے زائد کی کم ترین سطح پر پہنچ گیا، اس کے باوجود کہ واشنگٹن اور بیجنگ کے درمیان ٹیرف معاہدے کے قریب آنے سے مثبت رجحان پیدا ہوا تھا۔ تاہم امریکی صدر ڈونلڈ ٹرمپ کی جانب سے اوٹاوا کے ساتھ تجارتی مذاکرات کو اچانک ختم کرنے کے فیصلے نے مارکیٹ کے اس تیزی کے بیانیے میں غیریقینی کی کیفیت پیدا کردی ہے۔

سرمایہ کاروں نے گزشتہ ہفتے امریکی کانگریس میں فیڈرل ریزرو کے چیئرمین جیروم پاول کے بیان کو نرم لہجے میں تعبیر کیا، جب انہوں نے کہا کہ اگر رواں موسمِ گرما میں مہنگائی ٹیرف کے باعث غیر معمولی طور پر نہ بڑھی تو شرح سود میں کمی کا امکان موجود ہے۔

سی ایم ای گروپ کے فیڈ واچ ٹول کے مطابق، ستمبر تک کم از کم ایک چوتھائی پوائنٹ (0.25 فیصد) شرح سود میں کمی کی توقعات بڑھ کر 92.4 فیصد تک پہنچ گئی ہیں، جو ایک ہفتہ قبل تقریباً 70 فیصد تھیں۔

امریکی ڈالر انڈیکس — جو ڈالر کو یورو، پاؤنڈ اور فرانک سمیت 6 اہم عالمی کرنسیوں کے مقابلے میں جانچتا ہے — 0.1 فیصد اضافے کے ساتھ 97.276 تک پہنچ گیا، تاہم یہ اب بھی گزشتہ ہفتے کے آخر میں ریکارڈ کی گئی تین سال سے زائد کی کم ترین سطح 96.933 سے زیادہ دور نہیں ہے۔