بائیکیا نے ڈیجیٹل ادائیگی کی سہولت متعارف کرادی

رائیڈ ہیلنگ اور ڈلیوری سروس فراہم کرنے والی کمپنی بائیکیا نے اعلان کیا ہے کہ وہ اپنی تمام سواریوں کے لیے ڈیجیٹل ادائیگی کی سہولت متعارف کروا رہی ہے تاکہ صارفین کو ایک آسان، محفوظ اور کیش لیس سفر کا تجربہ فراہم کیا جاسکے۔

لنکڈاِن پر ایک پوسٹ میں بائیکیا کے چیف آپریٹنگ آفیسر اور شریک بانی رفیق ملک نے اس اقدام کو پاکستان میں شہری نقل و حمل کو جدید خطوط پر استوار کرنے کے بائیکیا کے سفر میں ایک اہم سنگِ میل قرار دیا۔

اس نئے اقدام کے تحت مسافر اب بائیکیا کے ڈرائیور پارٹنرز کو ایزی پیسہ، جاز کیش اور آن لائن بینک ٹرانسفر کے ذریعے ادائیگی کرسکتے ہیں۔

رفیق ملک نے کہا کہ یہ تبدیلی صرف سہولت تک محدود نہیں، بلکہ مالی شمولیت کے فروغ اور زیادہ محفوظ، مؤثر سفر کی جانب ایک انقلابی قدم ہے۔

انہوں نے مزید کہا کہ ایسے صارفین کے لیے جو نقد رقم ساتھ رکھنے سے گریز کرتے ہیں یا ڈیجیٹل والیٹس اور بینک ٹرانسفرز کو ترجیح دیتے ہیں، یہ سہولت بہترین ہے اور نقدی کے لین دین سے جڑے خطرات کو کم کرتی ہے۔

رفیق ملک نے کہا کہ یہ اقدام نہ صرف صارفین کے لیے سہولت میں اضافہ کرے گا بلکہ معیشت کو کیش لیس نظام کی جانب لے جانے والی ایک بڑی تبدیلی میں بھی مددگار ثابت ہوگا — ایسا نظام جو شفافیت، سیکیورٹی اور ہر فرد کے لیے مالی رسائی کو فروغ دیتا ہے۔

بزنس ریکارڈر سے گفتگو کرتے ہوئے رفیق ملک نے بتایا کہ بائیکیا نے ابتدا میں ایک نقدی پر مبنی پلیٹ فارم کے طور پر کام شروع کیا، جو پاکستان میں نقد لین دین پر انحصار کے رجحان کی عکاسی کرتا تھا۔ تاہم، صارفین کی بڑھتی ہوئی طلب نے کمپنی کو ڈیجیٹل ادائیگیوں کی طرف پیش قدمی پر آمادہ کیا۔ انہوں نے کہا کہ راست کے اجراء اور ڈیجیٹل والیٹس کے استعمال میں دگنا اضافہ ہونے سے وقت بالکل موزوں ہوگیا تھا، راست اسٹیٹ بینک آف پاکستان کا تیار کردہ ایک فوری اور محفوظ ادائیگی کا نظام ہے۔

انہوں نے مزید کہا کہ اگرچہ اس وقت کارڈ سے ادائیگی کی سہولت موجود نہیں لیکن کمپنی مستقبل میں کارڈز کو نظام میں شامل کرنے پر غور کرسکتی ہے۔

انہوں نے کہا کہ اس تبدیلی کے لیے ایک ماہ تک ٹیکنالوجی کے ڈھانچے کو اپ گریڈ کرنا پڑا اور اب ہمارے سامنے ایک اور اہم اور مشکل مرحلہ ہے — ڈرائیورز اور صارفین کو اس نئے نظام سے آگاہ اور تربیت دینا ہوگی۔

انہوں نے مزید کہا کہ بائیکیا کا یہ قدم صرف ادائیگیوں تک محدود نہیں بلکہ یہ پاکستان کی غیر رسمی معیشت — جیسے ڈرائیورز اور چھوٹے تاجر — کو ڈیجیٹل دھارے میں شامل کرنے کا ایک دروازہ ہے۔

یہ اعلان ایسے وقت میں سامنے آیا ہے جب چند روز قبل ہی پاکستانی نژاد رائیڈ ہیلنگ کمپنی کریم نے پاکستان میں اپنی سروسز بند کرنے کا اعلان کیا تھا۔

لنکڈاِن پوسٹ پر ایک تبصرے میں رفیق ملک نے کہا کہ کریم اور وہاں موجود ہمارے ساتھیوں نے پاکستان میں رائیڈ ہیلنگ کے میدان میں بنیاد رکھی، اُن کا کردار بانی حیثیت رکھتا ہے اور ہم اس شعبے کی ترقی میں اُن کی قیمتی خدمات کو دل سے سراہتے ہیں۔