ایئر انڈیا طیارہ حادثے پر پاکستانی رہنماؤں کا اظہار افسوس، تعزیتی پیغامات

بھارت کے شہر احمد آباد کے قریب جمعرات کو ایئر انڈیا کے طیارے کو پیش آنے والے المناک حادثے کی خبر نے دنیا کو ہلا کر رکھ دیا ہے۔ حادثے میں 200 سے زائد مسافر جان کی بازی ہار گئے۔ لندن کے گیٹ وک ایئرپورٹ کے لیے روانہ ہونے والا طیارہ، جس میں 242 افراد سوار تھے، پرواز کے چند ہی منٹ بعد گر کر تباہ ہو گیا، جس نے بھارت کو سوگ میں مبتلا کر دیا۔

جب ریسکیو ٹیموں نے قریبی رہائشی علاقے میں ملبے سے سوختہ لاشیں نکالیں تو غم کی لہر دنیا بھر میں پھیل گئی۔

پاکستان کے سابق وزیر اعظم نواز شریف نے اپنے پیغام میں مشترکہ انسانی اقدار، جذبات اور ہمدردی پر زور دیا ہے۔

انہوں نے ایکس پر لکھا کہ احمد آباد میں ایئر انڈیا کے جہاز کو پیش آنے والے افسوسناک حادثے میں قیمتی جانیں کھونے والے خاندانوں سے دلی تعزیت کرتا ہوں، یہ افسوسناک جانی نقصان سرحدوں کی تقسیم سے بالاتر ہے اور ہماری مشترکہ انسانی اقدار کی یاد دہانی کراتا ہے۔ وزیر اعظم مودی اور بھارت کے عوام سے ہمدردی کا اظہار کرتا ہوں۔

پاکستان کے سابق وزیر خارجہ بلاول بھٹو زرداری نے بھی واقعے پر افسوس کا اظہار کیا۔

انہوں نے کہا کہ مجھے آج صبح معلوم ہوا ہے کہ ایک المناک حادثہ پیش آیا، ایئر انڈیا کا طیارہ احمد آباد، بھارت کے قریب پرواز کے کچھ ہی دیر بعد گر کر تباہ ہوگیا جس میں 240 افراد کی موت واقع ہوئی، میں بھارتی عوام کے لیے اپنی تعزیت کا اظہار کرتا ہوں۔

پاکستان کے نائب وزیراعظم اور وزیر خارجہ اسحاق ڈار نے اس افسوس ناک فضائی حادثے پر افسوس کا اظہار کیا ہے۔

انہوں نے لکھا کہ احمد آباد گجرات میں ایئر انڈیا کی پرواز کے حادثے پر دُکھ ہوا۔ اس المناک واقعے میں قیمتی جانوں کے ضیاع پر تعزیت پیش کرتا ہوں۔ اس غم کے وقت ہماری ہمدردیاں متاثرہ خاندانوں کے ساتھ ہیں۔