آئندہ بجٹ، خدمات پر سیلز ٹیکس کی وصولی پر صوبائی دائرہ کار میں اختلاف، اسٹاک ایکسچینج کا معاملہ مشترکہ مفادات کونسل میں حل کرنے کی تجویز

پاکستان اسٹاک ایکسچینج (پی ایس ایکس) نے وفاقی اور صوبائی حکومتوں پر زور دیا ہے کہ خدمات پر سیلز ٹیکس کی وصولی کے حوالے سے صوبوں کے درمیان دائرہ اختیار کے اختلافات کا معاملہ مشترکہ مفادات کونسل (سی سی آئی) میں اٹھایا جائے، اس امید کے ساتھ کہ یہ بااختیار ادارہ خوش اسلوبی سے ہر صوبے کے لیے ”آمدنی کی تقسیم کا فارمولا“ وضع کرے گا تاکہ اس اہم مسئلے کا حل نکالا جا سکے۔

انہوں نے کہا کہ خدمات جیسے کہ فنڈ اور اثاثہ جات کا انتظام صوبائی سیلز ٹیکس کے دائرہ کار میں آتی ہیں۔

”سندھ ریونیو بورڈ، پنجاب ریونیو اتھارٹی اور خیبرپختونخوا ریونیو اتھارٹی کے نافذ کردہ قوانین کی زبان میں تضاد ہے۔ سندھ سیلز ٹیکس کے قانون کے مطابق، وہ خدمات جہاں کاروبار رجسٹرڈ ہو وہاں سیلز ٹیکس لاگو ہوتا ہے، جبکہ پنجاب سیلز ٹیکس آن سروسز ایکٹ 2012 اور خیبرپختونخوا فنانس ایکٹ 2013 کے مطابق وہ صوبہ جہاں خدمات فراہم یا انجام دی جائیں، وہ اس پر سیلز ٹیکس عائد کرنے، وصول کرنے اور چارج کرنے کا مجاز ہے۔“

بجٹ تجاویز میں کہا گیا کہ ہم (پی ایس ایکس) درخواست کرتے ہیں کہ یہ مسئلہ، جو تمام صوبوں کے لیے یکساں اہمیت رکھتا ہے اور پورے خدماتی شعبے کو متاثر کرتا ہے، اسے مشترکہ مفادات کونسل کے ایجنڈے میں شامل کیا جائے تاکہ ایک متفقہ آمدنی تقسیم کا فارمولا تیار کیا جا سکے۔

تینوں صوبے عام طور پر خدمات پر 15 سے 16 فیصد کے درمیان سیلز ٹیکس عائد کرتے ہیں، تاہم ٹیلی کمیونیکیشن خدمات کی صورت میں بعض صوبے یہ شرح 19.5 فیصد تک رکھتے ہیں۔

اسٹاک مارکیٹ کی انتظامیہ نے مالی سال 26-2025 کے لیے اپنی بجٹ تجاویز میں اس مسئلے کو اجاگر کیا، کیونکہ خدمات پر سیلز ٹیکس کی وصولی پر اختلاف ”پورے خدماتی شعبے“ کو متاثر کر رہا ہے، بشمول پی ایس ایکس پر لسٹڈ کمپنیاں۔

پاکستان اسٹاک ایکسچینج میں تقریباً 550 کمپنیوں کے حصص کی تجارت ہوتی ہے جن کا مجموعی مارکیٹ کیپیٹلائزیشن 14.73 کھرب روپے (تقریباً 52 ارب ڈالر یا مالی سال 25-2024 کے جی ڈی پی کا 12.7 فیصد) ہے۔

کم از کم ٹیکس کے خاتمے کی سفارش

پی ایس ایکس نے مزید درخواست کی کہ کم از کم ٹیکس کا نظام لسٹڈ کمپنیوں کے لیے ختم کر دیا جائے کیونکہ ایسی کمپنیاں مختلف قوانین کے تحت مخصوص دستاویزی تقاضوں کی سختی سے پابند ہوتی ہیں۔

پی ایس ایکس نے وضاحت کی کہ لسٹڈ کمپنیوں پر کم از کم ٹیکس کا نفاذ معیشت کی دستاویز بندی کی حوصلہ شکنی کرتا ہے۔

لسٹڈ کمپنیاں پہلے ہی وسیع پیمانے پر ضابطہ جاتی تقاضے پورے کرتی ہیں جن میں آڈٹ، ٹیکس فائلنگ، ایڈوانس ٹیکس کی ادائیگی، اور ود ہولڈنگ اسٹیٹمنٹس شامل ہیں، جو ان کے کھاتوں کو قانونی معیارات سے ہم آہنگ بناتے ہیں اور حکام کے ساتھ اعتماد پیدا کرتے ہیں۔

تاہم، کم از کم ٹیکس کا نفاذ لسٹڈ کمپنیوں کی آمدنی کو نیچے لے آتا ہے، چاہے ان کے موجودہ یا گزشتہ سالوں کے نقصانات ہوں۔

پی ایس ایکس نے یہ بھی تجویز دی کہ چھوٹے اور درمیانے درجے کے کاروبار (ایس ایم ایز) جو اسٹاک ایکسچینج میں لسٹڈ ہوں، ان کے لیے ٹیکس کریڈٹ میں اضافہ کیا جائے، کیونکہ یہ پاکستان کی روزگار، برآمدات اور جی ڈی پی کی نمو میں بڑا کردار ادا کرتے ہیں، اور ملک میں 80 فیصد ملازمتیں فراہم کرتے ہیں۔

پی ایس ایکس نے تجویز پیش کی کہ ایس ایم ایز بورڈ پر لسٹڈ کمپنیوں کی حوصلہ افزائی کے لیے تجویز ہے کہ ان پر لاگو ٹیکس کی شرح کو مستقل طور پر کم کیا جائے، مثلاً لسٹنگ کے 3 سے 4 سال کے لیے ٹیکس کریڈٹ کی صورت میں ٹیکس میں 50 فیصد رعایت دی جائے، اور بعد ازاں 20 فیصد ٹیکس کریڈٹ دیا جائے۔

پی ایس ایکس نے تجویز دی کہ سیکیورٹیز کی فروخت/منتقلی پر لگنے والے کیپیٹل گین ٹیکس (سی جی ٹی) کی شرح کو غیر منقولہ جائیداد پر سی جی ٹی کی شرح کے ساتھ ہم آہنگ کیا جائے۔ پی ایس ایکس میں ٹریڈ ہونے والے تمام ڈیویریویٹوز اور فیوچر کنٹریکٹس پر سی جی ٹی کی شرح کو پاکستان مرکنٹائل ایکسچینج (پی ایم ای ایکس) میں ٹریڈ ہونے والے کموڈیٹی فیوچر کنٹریکٹس کے ساتھ ہم آہنگ کیا جائے۔ رئیل اسٹیٹ سیکٹر کو دستاویزی بنایا جائے اور رئیل اسٹیٹ انویسٹمنٹ ٹرسٹس (آر ای آئی ٹیز) کو فروغ دیا جائے۔ پی ایس ایکس میں غیر ملکی سرمایہ کاری کو فروغ دینے کے لیے ٹیکس میں ریلیف دیا جائے۔

پی ایس ایکس نے زور دیا کہ مزید کمپنیوں کی لسٹنگ کے لیے ادائیگی کے نظام کو ڈیجیٹل بنایا جائے اور معیشت کو دستاویزی بنانے کے لیے ٹیکنالوجی کا استعمال کیا جائے، کیونکہ نقدی پر مبنی معیشت کا حجم جی ڈی پی کا 35 سے 50 فیصد تک سمجھا جاتا ہے۔