جناح انٹرنیشنل ایئرپورٹ، رن وے اپگریڈیشن منصوبہ 53 فیصد مکمل

پاکستان سول ایوی ایشن اتھارٹی (پی سی سی اے) نے بدھ کے روز اعلان کیا ہے کہ جناح انٹرنیشنل ایئرپورٹ (جے آئی اے پی) پر رن وے 07ایل/25آر کی اپگریڈیشن کا منصوبہ مئی 2025 کے اختتام تک 53 فیصد مکمل ہو چکا ہے، جو منصوبہ بند ہدف 51 فیصد سے زیادہ ہے۔

اتھارٹی کے بیان کے مطابق یہ منصوبہ جولائی 2024 میں شروع ہوا تھا اور یہ طے شدہ شیڈول کے مطابق جاری ہے، جس کی تکمیل جنوری 2026 تک متوقع ہے۔

پی سی اے اے نے بتایا کہ اس اہم قومی منصوبے کی بروقت تکمیل یقینی بنانے کے لیے سائٹ پر ڈبل شفٹ آپریشنز جاری ہیں۔

اتھارٹی کے مطابق ایک اہم پیش رفت اس وقت حاصل ہوئی جب ایئر فیلڈ لائٹنگ (اے ایف ایل) کا پہلا درآمد شدہ سامان منصوبے کی سائٹ پر پہنچا۔ اس جدید نظام کی تنصیب کی تیاری کے لیے پی سی اے اے کے انجینئرز بیرون ملک تربیت مکمل کر چکے ہیں۔

یہ منصوبہ جس کی مالیت 8.3 ارب روپے ہے، پاکستان بھر میں ہوائی اڈوں کے انفراسٹرکچر کو بہتر بنانے کے لیے اتھارٹی کے عزم کا مظہر ہے۔

منصوبے کی تکمیل کے بعد کراچی ایئرپورٹ کی صلاحیت کیٹگری 4 ایف تک پہنچ جائے گی، جو وسیع باڈی والے طیاروں اور اعلیٰ آپریشنل تقاضوں کی تکمیل کی اہل ہوگی۔

یہ اپگریڈیشن اندرون اور بیرون ملک ایئرلائنز کو مستقبل میں جے آئی اے پی پر اپنی پروازیں چلانے کی ترغیب دے گی۔ منصوبے کی تکمیل پر رن وے میں جدید، توانائی بچانے والا ایل ای ڈی سی اے ٹی-I ایئر فیلڈ لائٹنگ سسٹم، بشمول رن وے سینٹرلائن لائٹس، نصب کیا جائے گا۔

منصوبے میں رن وے کو 1,000 فٹ تک بڑھا کر 11,500 فٹ کرنا، دونوں سروں پر ٹیکسی ویز اور اووررنز کی از سر نو تعمیر، اور 07ایل اینڈ کے قریب چار ٹیکسی لنکس پر اسفالٹک اوورلے بھی شامل ہیں۔