پاکستان نے جمعہ کو ہانگ کانگ میں قائم ہونے والی عالمی ثالثی تنظیم کے قیام کی کنونشن پر دستخط کردیے۔
دفتر خارجہ کے جاری کردہ بیان کے مطابق نائب وزیراعظم و وزیر خارجہ اسحاق ڈار نے ہانگ کانگ میں بین الاقوامی ثالثی تنظیم کے قیام سے متعلق کنونشن پر دستخط کیے۔
نائب وزیراعظم نے کہا کہ آج کی تقریب نہ صرف بین الاقوامی ثالثی اور سفارت کاری کے ایک نئے دور کا آغاز ہے بلکہ کثیرالجہتی تعاون اور ثالثی کے اصولوں کی حمایت کے لیے ایک اہم عالمی ادارے کی پیدائش بھی ہے۔
انہوں نے کہا کہ پاکستان کو عالمی ثالثی تنظیم کے بانی اراکین میں شامل ہونے پر فخر ہے۔
ڈپٹی وزیراعظم اسحاق ڈار نے کہا کہ ہم سمجھتے ہیں کہ اقوام متحدہ کے چارٹر کے اصولوں کی سختی سے پاسداری، سلامتی کونسل کی قراردادوں پر مکمل عملدرآمد اور بین الاقوامی قانون کے احترام کے ذریعے ہی امن، سلامتی اور عالمی خوشحالی کو فروغ دیا جا سکتا ہے۔
بیان کے مطابق بین الاقوامی ثالثی تنظیم کے قیام کا تصور اپریل 2019 میں بیجنگ میں منعقدہ دوسرے بیلٹ اینڈ روڈ فورم کے اہم نتائج میں سے ایک تھا۔ چین نے 2021 میں اس تنظیم کے قیام کیلئے مشاورت کا آغاز کیا اور پاکستان کو بانی ارکان میں شامل ہونے کے لیے مذاکرات میں شمولیت کی دعوت دی۔
دفتر خارجہ (ایف او) کے مطابق، یہ تنظیم تمام ممالک کے لیے کھلی ہے، اور ہر ملک کی خودمختاری، بنیادی مفادات اور جائز تحفظات کے احترام پر مبنی ہے۔ اس کا مقصد متعلقہ فریقین کے درمیان برابری کی بنیاد پر مکالمے اور اعتماد کو فروغ دینا ہے جبکہ مختلف قانونی نظاموں اور ان کے ثالثوں کی شمولیت کی خواہاں ہے۔
قبل ازیں دفتر خارجہ نے بتایا تھا کہ نائب وزیراعظم چین میں ہونے والے اجلاس کے موقع پر کئی دو طرفہ ملاقاتیں بھی کریں گے۔
Comments
Comments are closed.