کمپنیوں کو منافع کارکردگی پر کمانا چاہیے، کے الیکٹرک ٹیرف میں نظرثانی کی درخواست کرینگے، وزیر توانائی

وفاقی وزیر توانائی سردار اویس احمد خان لغاری نے اعلان کیا ہے کہ وفاقی حکومت نیپرا میں کے-الیکٹرک کے ٹیرف کے حوالے سے نظرثانی کی درخواست دائر کرے گی۔ انہوں نے زور دیا کہ کمپنیوں کو منافع کارکردگی کی بنیاد پر کمانا چاہیے — سبسڈی یا خیراتی امداد کے ذریعے نہیں۔

یہ بیان ایک روز بعد سامنے آیا جب انہوں نے ایکس (سابقہ ٹوئٹر) پر نیپرا کی کے-الیکٹرک سے متعلق حالیہ ٹیرف ڈیٹرمنیشن پر متعدد سوالات اٹھائے۔

جمعرات کے روز، سینٹر فار اکنامک ریسرچ اِن پاکستان (سی ای آر پی) کے زیرِ اہتمام منعقدہ ایک انرجی ورکشاپ سے خطاب کے بعد میڈیا سے گفتگو کرتے ہوئے اویس لغاری نے کہا کہ پاور ڈویژن ایسی پٹیشن تیار کر رہا ہے تاکہ نہ تو وفاقی حکومت اور نہ ہی بجلی کے صارفین پر غیر ضروری مالی بوجھ پڑے۔

انہوں نے کہا، ’ہم نجکاری کی جانب بڑھ رہے ہیں اور کے-الیکٹرک — دیگر نجی سرمایہ کاروں کی طرح — کو اپنی کارکردگی کی بنیاد پر منافع کمانا چاہیے۔ عطیات پر انحصار ایک پائیدار ماڈل نہیں؛ کارکردگی کو ترجیح دی جانی چاہیے۔ ریگولیٹری قوانین کا اطلاق تمام ڈسٹری بیوشن کمپنیوں (ڈسکوز) پر ہونا چاہیے۔

کے-الیکٹرک کے منظور شدہ ٹیرف میں پہلے سے منظور شدہ ملٹی ایئر ٹیرف کے مقابلے میں 18 فیصد اضافہ ہوا ہے۔

ایک سوال کے جواب میں اویس لغاری نے کہا کہ پاور ڈویژن نیپرا سے صارفین کیلئے منصفانہ نرخ یقینی بنانے کا مطالبہ کرے گا۔ انہوں نے نشاندہی کی کہ کے-الیکٹرک کے موجودہ ٹیرف اسٹرکچر کا بوجھ دیگر ڈسٹری بیوشن کمپنیوں کے صارفین کراس سبسڈائزیشن اور ٹیکسز کے ذریعے اٹھا رہے ہیں۔

انہوں نے مزید کہا، ہمیں امید ہے کہ نیپرا ایسے فیصلے کرے گا جو ملک اور اس کے عوام دونوں کے مفاد میں ہوں۔

نیٹ میٹرنگ کے بارے میں وزیر توانائی نے بتایا کہ اس پالیسی پر دوبارہ نظرثانی کی گئی ہے اور اسٹیک ہولڈرز سے مشاورت مکمل ہو چکی ہے۔ ’اگر منظوری دی گئی تو نئی نیٹ میٹرنگ پالیسی ایک ماہ کے اندر نافذ کر دی جائے گی۔

اویس لغاری نے بجلی کی لاگت میں کمی کو بھی اجاگر کیا، انہوں نے کہا کہ صنعتی شعبے کیلئے بجلی کی قیمتوں میں 31 فیصد اور 1.8 کروڑ گھریلو صارفین کیلئے 50 فیصد کمی آئی ہے۔ تاہم، انہوں نے اعتراف کیا کہ موسمیاتی تبدیلیوں کی وجہ سے ہائیڈرو پاور کی پیداوار میں کمی آئی ہے، جس کے باعث مہنگے ذرائع پر انحصار بڑھا ہے۔ فیول پرائس ایڈجسٹمنٹ (ایف پی اے) ہر ماہ مختلف ہوتا ہے، مگر مجموعی طور پر پاکستان میں بجلی کی قیمتیں کم ہوئی ہیں۔

گردشی قرضے کے مسئلے پر اویس لغاری نے انکشاف کیا کہ حکومت جلد ہی اس قرض کو ختم کرنے کے لیے بینکوں سے قرض لے گی۔

اس سے قبل، ورکشاپ سے خطاب کرتے ہوئے وزیر توانائی نے کہا کہ وزیراعظم جلد ہی نئی صنعتی ٹیرف پالیسی کا اعلان کریں گے جس کا مقصد مسابقت میں اضافہ ہے۔ انہوں نے قابل تجدید توانائی کے لیے حکومت کے عزم کو دہرایا، اور بتایا کہ حالیہ مہینوں میں 3,000 میگاواٹ کے فرنس آئل پر مبنی بجلی گھر بند کیے جا چکے ہیں۔

اویس لغاری نے کہا کہ حکومت کا مقصد پائیدار بنیادوں پر بجلی کے نرخوں میں کمی لانا ہے۔ انہوں نے کہا کہ پاکستان میں متبادل توانائی کے ذرائع میں ایک انقلاب آ چکا ہے اور شمسی توانائی ایک امید افزا ذریعہ ہے جس کی پیداوار میں اضافہ ہو رہا ہے۔

انہوں نے مزید کہا کہ ماضی میں توانائی کے شعبے میں تخمینے حقیقت پر مبنی نہیں تھے۔ ہم گزشتہ ایک سال سے توانائی کے شعبے میں تحقیق اور تجزیہ کر رہے ہیں۔ ہم آئی پی پیز (انڈیپنڈنٹ پاور پروڈیوسرز) کے ساتھ کیے گئے معاہدوں کا جائزہ لے رہے ہیں اور مستقبل میں حکومت کو بجلی کی خریداری سے الگ کرنے کی کوشش کر رہے ہیں۔

وزیر توانائی نے مزید کہا کہ بھاشا ڈیم کو بجلی کے نظام میں شامل کرنا ایک اہم پیشرفت ہو گی۔ ہم یہ یقینی بنانے کی کوشش کر رہے ہیں کہ صارفین کو بجلی کے نظام کی ناقص منصوبہ بندی کا خمیازہ نہ بھگتنا پڑے۔

انہوں نے کہا کہ ٹرانسمیشن سسٹم میں اصلاحات کی جا رہی ہیں۔ ہمارے پاس ٹرانسفارمرز اور فیڈرز پر دباؤ جانچنے کی ٹیکنالوجی موجود نہیں۔ انہوں نے مزید کہا کہ حکومت کوئلے اور گیس پر مبنی بجلی گھروں کو ماحولیات پر اثر انداز ہونے سے روکنے کی کوشش کر رہی ہے۔ اگلے تین سالوں تک گرڈ کے ذریعے بجلی کی وافر مقدار دستیاب ہے۔

کاپی رائٹ بزنس ریکارڈر، 2025