پی ایس ایل فائنل کیلئے پنجاب پولیس کے 8 ہزار سے زائد اہلکار تعینات

انسپکٹر جنرل پولیس (آئی جی پی) ڈاکٹر عثمان انور نے اتوار کے روز کہا ہے کہ پاکستان سپر لیگ (پی ایس ایل 10) کے فائنل کی فول پروف سیکورٹی کو یقینی بنانے کیلئے 8 ہزار سے زائئد پولیس افسران اور اہلکار تعینات کردیے گئے ہیں۔ پی ایس ایل کا فائنل آج لاہور قلندرز اور کوئٹہ گلیڈی ایٹرز کی ٹیموں کے درمیان کھیلا جائے گا۔

پنجاب پولیس کے ترجمان کے مطابق، آئی جی پی نے حکام کو ہدایت دی ہے کہ مقامی اور بین الاقوامی کھلاڑیوں، آفیشلز اور میچ دیکھنے والے شائقین کے لیے سخت سیکورٹی اقدامات کیے جائیں۔

ڈاکٹر عثمان نے کہا کہ سینئر افسران سیکورٹی، ٹریفک مینجمنٹ اور عوامی تحفظ سے متعلق انتظامات کی خود نگرانی کریں گے۔ انہوں نے زور دیا کہ ڈیوٹی پر تعینات اہلکاروں کو انتہائی چوکنا رہنا چاہیے اور کسی بھی مشتبہ سرگرمی پر نظر رکھنی چاہیے۔

ڈاکٹر عثمان نے مزید کہا کہ ہم نے پی ایس ایل میچز کے لیے ایک جدید تر سیکورٹی حکمتِ عملی اپنائی ہے۔ انہوں نے لاہور، راولپنڈی اور ملتان میں پہلے ہونے والے میچز کے دوران امن قائم رکھنے پر پولیس فورسز کی کارکردگی کو سراہا۔

انہوں نے ضلعی انتظامیہ، قانون نافذ کرنے والے اداروں اور دیگر متعلقہ اداروں کے درمیان مؤثر ہم آہنگی کا بھی ذکر کیا جنہوں نے پی ایس ایل ایونٹس کے پرامن انعقاد میں اہم کردار ادا کیا ہے۔

اسپیشل یونٹس، جن میں ڈولفن اسکواڈ، پولیس رسپانس یونٹ اور ایلیٹ فورس شامل ہیں، اسٹیڈیم، اہم راستوں اور اطراف کے علاقوں میں گشت انجام دیں گے۔ اس کے علاوہ، ٹیموں کے راستوں، اسٹیڈیم کے احاطے، اور قیام کی جگہوں پر سی سی ٹی وی کیمروں کے ذریعے مسلسل نگرانی کی جائے گی۔

پنجاب پولیس نے ٹریفک ایڈوائزری بھی جاری کی ہے اور شہریوں سے اپیل کی ہے کہ وہ قانون نافذ کرنے والے اداروں سے تعاون کریں۔ اسٹیڈیم کے اطراف بلند عمارتوں پر اسنائپرز بھی تعینات کیے جائیں گے جو سیکیورٹی اقدامات کا حصہ ہیں۔

آئی جی پی نے کہا شائقین کرکٹ کو چاہیے کہ وہ پولیس کی ہدایات پر عمل کریں تاکہ میچ کو ایک محفوظ اور پُرامن ماحول میں مکمل طور پر انجوائے کیا جا سکے۔