پاکستان اور ورلڈ بینک کے درمیان کنٹری پارٹنرشپ فریم ورک کے تحت ترجیحی شعبوں پر بات چیت
- اجلاس کا مرکزی محور دو طرفہ تعاون کو مضبوط بنانا، عالمی بینک کے مالیاتی منصوبوں کا جائزہ لینا اور حال ہی میں شروع کیے گئے 10 سالہ کنٹری پارٹنرشپ فریم ورک (سی پی ایف) کے نفاذ کو تیز کرنا تھا۔
فنانس ڈویژن میں جمعرات کے روز وفاقی وزیر برائے خزانہ و محصولات سینیٹر محمد اورنگزیب اور عالمی بینک کی آپریشنز کی منیجنگ ڈائریکٹر اینا بیئرڈ کی سربراہی میں عالمی بینک کے ایک اعلیٰ سطح وفد کے درمیان ایک اہم اجلاس منعقد ہوا۔
اجلاس کا مرکزی محور دو طرفہ تعاون کو مضبوط بنانا، عالمی بینک کے مالیاتی منصوبوں کا جائزہ لینا اور حال ہی میں شروع کیے گئے 10 سالہ کنٹری پارٹنرشپ فریم ورک (سی پی ایف) کے نفاذ کو تیز کرنا تھا۔
مذاکرات میں فریم ورک کے تحت مقرر کردہ ترجیحی شعبوں پر بات چیت ہوئی، جن میں ماحولیاتی تحفظ اور آبادی کے نظم و نسق پر خصوصی توجہ دی گئی — جو سی پی ایف کے چھ بنیادی ستونوں میں شامل ہیں۔
دونوں فریقین نے سی پی ایف کو پاکستان میں پائیدار ترقی اور طویل مدتی معاشی استحکام کے حصول کے لیے ایک اہم ذریعہ قرار دیا۔
اینا بیئرڈ نے مشکل لیکن ناگزیر اصلاحات پر حکومتِ پاکستان کے تسلسل کے ساتھ عزم کی تعریف کی اور مشکل حالات میں اصلاحاتی رفتار کو برقرار رکھنے کی کوششوں کو سراہا۔
انہوں نے پاکستان کی سیاسی و اقتصادی قیادت کی ماحولیاتی تبدیلیوں کے حوالے سے فعال پالیسیوں اور معاشی ترقی کو ماحولیاتی پائیداری سے ہم آہنگ کرنے کی کوششوں کو بھی سراہا۔
وزیر خزانہ محمد اورنگزیب نے سی پی ایف کے لیے حکومتِ پاکستان کے بھرپور عزم کا اعادہ کرتے ہوئے کہا کہ ہم اس بات کو یقینی بنانے کیلئے پر عزم ہیں کہ ماحولیاتی لچک اور پائیدار ترقی ہماری معاشی منصوبہ بندی کا بنیادی حصہ رہیں۔ سی پی ایف ہمارے لیے ایک اہم موقع ہے اور ہم اسے تمام متعلقہ وزارتوں اور شراکت داروں کے ساتھ مکمل ہم آہنگی کے ساتھ نافذ کرنا چاہتے ہیں۔
انہوں نے بتایا کہ وزارت خزانہ، وزارت موسمیاتی تبدیلی اور دیگر متعلقہ ادارے ایک مضبوط نفاذی فریم ورک تشکیل دینے کے لیے مشترکہ طور پر کام کر رہے ہیں۔
انہوں نے عالمی بینک سے درخواست کی کہ وہ تکنیکی رہنمائی اور معاونت فراہم کرے تاکہ عمل درآمد کے طریقہ کار کو آسان بنایا جا سکے اور سی پی ایف کی ترجیحی اور ہدفی عملدرآمد کو یقینی بنایا جا سکے۔
جواب میں، اینا بیئرڈ نے سی پی ایف کے اہداف کے حصول کے لیے عالمی بینک کی مکمل معاونت کا یقین دلایا۔
انہوں نے اصلاحاتی شعبوں جیسے ٹیکسیشن، توانائی، اور سماجی تحفظ میں عالمی بینک کی شمولیت مزید بڑھانے کی خواہش کا اظہار کیا، اور لڑکیوں کی تعلیم اور خواتین کو بااختیار بنانے کے اقدامات کو خصوصی اہمیت دی — جنہیں انہوں نے پاکستان کی انسانی ترقی اور معاشی لچک کو مضبوط بنانے کے لیے کلیدی قرار دیا۔
اجلاس کا اختتام اس باہمی عزم کے ساتھ ہوا کہ آنے والے مہینوں میں سی پی ایف کو عملی جامہ پہنانے اور پاکستان کی پائیدار ترقی کے لیے مضبوط شراکت داری قائم کرنے کے لیے قریبی تعاون جاری رکھا جائے گا۔
کاپی رائٹ بزنس ریکارڈر، 2025
Comments
Comments are closed.