ٹرمپ کے ٹیرف پاکستان کی معیشت پر بوجھ ڈالیں گے، آئی ایم ایف کی وارننگ

بین الاقوامی مالیاتی فنڈ (آئی ایم ایف) نے خبردار کیا ہے کہ امریکی صدر ڈونلڈ ٹرمپ کی جانب سے حالیہ باہمی ٹیرف کے نفاذ سے پاکستان کی برآمدات اور اقتصادی ترقی پر منفی اثرات مرتب ہوں گے۔

آئی ایم ایف نے اپنی تازہ ترین رپورٹ ”ایکسٹینڈڈ فنڈ فیسیلٹی (ای ایف ایف) انتظام کے تحت پہلی جائزہ رپورٹ، کارکردگی کے معیارات میں ترمیم کی درخواست، اور ریزیلینس اینڈ سسٹین ایبل فیسیلٹی (آر ایس ایف) انتظام کی درخواست“ میں کہا ہے کہ اگرچہ ان اقدامات کے معیشت پر حتمی اثرات کے بارے میں کافی غیر یقینی صورتحال ہے، لیکن یہ ٹیرف اور مالیاتی منڈی کے ردعمل سے مالی سال 2025 میں معمولی کمی اور 2026 میں تقریباً 0.3 فیصد پوائنٹس کی کمی کے ساتھ پاکستان کی برآمدات اور جی ڈی پی پر دباؤ متوقع ہے۔

2 اپریل 2025 کو امریکہ نے کئی ممالک پر مخصوص ٹیرف میں بڑے اضافے کا اعلان کیا، جن میں پاکستان پر 29 فیصد ٹیرف بھی شامل ہے۔

اگرچہ پاکستان کا برآمدی شعبہ نسبتاً چھوٹا ہے، یعنی جی ڈی پی کا 10 فیصد، لیکن امریکہ پاکستان کا سب سے بڑا تجارتی شراکت دار ہے، جہاں ٹیکسٹائل اور ملبوسات کی برآمدات سب سے بڑا حصہ رکھتی ہیں۔

اگرچہ بعض ٹیرف مذاکرات کے بعد تبدیل ہوسکتے ہیں، تاہم اس وقت پاکستان کے ان شعبوں میں کئی حریف ممالک بھی بھاری ٹیرف کا سامنا کر رہے ہیں، جیسے بنگلہ دیش (37 فیصد)، چین (145 فیصد)، بھارت (26 فیصد) اور ویتنام (46 فیصد)۔

آئی ایم ایف نے وسیع تر بالواسطہ اثرات کی بھی نشاندہی کی، اور کہا کہ امریکہ کو پاکستان کی برآمدات پر براہ راست اثرات کے علاوہ، پاکستان کو بالواسطہ اثرات کا بھی سامنا ہوگا، جن میں دیگر تجارتی شراکت داروں کی معیشتوں پر ٹیرف کے اثرات، سخت عالمی مالیاتی حالات، ممکنہ طور پر کم ترسیلات زر، اور تجارتی پالیسی کی غیر یقینی صورتحال شامل ہیں۔

آئی ایم ایف نے کہا کہ پاکستان کے توازنِ ادائیگی پر مجموعی اثر کو حالیہ کموڈیٹی قیمتوں میں کمی اور معاشی سرگرمیوں میں سستی کی وجہ سے معتدل ہونے کی توقع ہے، جو کہ پاکستان کے درآمدی بل کو کم کرے گا۔

آئی ایم ایف نے نوٹ کیا کہ 2 اپریل کے بعد سے پاکستان کے خودمختار بانڈ اسپریڈز میں تیزی سے اضافہ ہوا ہے، تاہم قلیل مدت میں بیرونی مالی وسائل تک رسائی پہلے ہی محدود ہے، جس سے قریبی مدت کے اثرات محدود ہو جاتے ہیں۔

تاہم، اگر زرمبادلہ کے اخراج کا دباؤ بڑھتا ہے تو ضروری ہوگا کہ شرح مبادلہ کو ایڈجسٹمنٹ کرنے کی اجازت دی جائے۔

مزید برآں، رپورٹ میں کہا گیا کہ مہنگائی پر مجموعی اثر بھی معمولی رہنے کی توقع ہے، کیونکہ کم کموڈیٹی قیمتیں اور سست معاشی نمو قیمتوں پر نیچے کا دباؤ ڈال سکتی ہیں۔

گزشتہ ماہ وزیر خزانہ محمد اورنگزیب نے بلومبرگ کو دیے گئے ایک انٹرویو میں کہا تھا کہ پاکستان امریکہ سے مزید اشیاء درآمد کرنا چاہتا ہے اور نان-ٹیرف رکاوٹوں کو ختم کرنا چاہتا ہے تاکہ ٹرمپ کے بھاری ٹیرف سے بچا جا سکے۔