وزیر خزانہ کی وفاقی بجٹ پر آئی ایم ایف کے ساتھ ورچوئل مشاورت

وفاقی وزیرِ خزانہ سینیٹر محمد اورنگزیب نے 7 ارب ڈالر کے ایکسٹینڈڈ فنڈ فیسلٹی (ای ایف ایف) پروگرام کے تحت آئی ایم ایف کی سفارشات کے مطابق معاشی اصلاحات جاری رکھنے کے پاکستان کے عزم کا اعادہ کیا ہے۔

وزیرِ خزانہ نے یہ بات انٹرنیشنل مانیٹری فنڈ (آئی ایم ایف) کے ساتھ ایک ورچوئل اجلاس کے دوران کہی، جس میں پاکستان کی معاشی اصلاحات اور مالی سال 26-2025 کے بجٹ کی تیاریوں پر تبادلہ خیال کیا گیا۔

اجلاس میں سیکریٹری خزانہ امداد اللہ بوسال اور اقتصادی ٹیم کے دیگر اہم ارکان نے بھی شرکت کی۔ آئی ایم ایف کو ملک میں جاری معاشی اصلاحات، مالیاتی استحکام کے اقدامات اور آئندہ مالی سال کے لیے بجٹ تجاویز سے آگاہ کیا گیا۔ وزیرِ خزانہ نے پاکستان کے لیے نئی تعینات ہونے والی آئی ایم ایف مشن چیف ایوا پیٹرووا کو خوش آمدید کہا اور سبکدوش ہونے والے مشن چیف نیتھن پورٹر کی خدمات اور تعاون پر ان کا شکریہ ادا کیا۔

اجلاس کے دوران آئی ایم ایف ٹیم، جس کی قیادت مشن چیفس کر رہے تھے، نے قومی معیشت کے استحکام کے لیے پاکستان کو مسلسل تعاون کی یقین دہانی کرائی۔ مذاکرات میں پرائمری سرپلس کا حصول، صوبائی ٹیکس محصولات میں اضافہ، سرکاری اداروں کی تنظیمِ نو، نجکاری کی کوششیں، اور عوامی شعبے کے اداروں کی تنظیمِ نو جیسے اہم امور پر گفتگو کی گئی۔

آئندہ بجٹ سے متعلق پاکستان اور آئی ایم ایف کے درمیان مشاورت جاری ہے، اور دونوں فریق معاشی پالیسیوں اور اصلاحاتی اقدامات کو ہم آہنگ کرنے کے لیے کام کر رہے ہیں۔