آئندہ مالی سال کا بجٹ

وزیر خزانہ محمد اورنگزیب نے ایک غیر ملکی خبر رساں ایجنسی سے گفتگو کرتے ہوئے واضح الفاظ میں کہا کہ انٹرنیشنل مانیٹری فنڈ (آئی ایم ایف) کا پروگرام مقررہ شیڈول کے مطابق درست سمت میں جاری ہے، اور مالی سال 26-2025 کے بجٹ پر مشاورت آج 14 مئی سے 23 مئی تک جاری رہےگی۔

جاری ایکسٹینڈڈ فنڈ فسیلٹی (ای ایف ایف) پروگرام میں متعدد وقتی اقدامات/ساختی اہداف شامل ہیں، جن میں درج ذیل شامل ہیں: (i) حکومت کی جانب سے زرعی اجناس کی خریداری اور ان میں مداخلت کو ختم کرنا، جو اس وقت ریاستی اداروں یا صوبائی فوڈ ڈپارٹمنٹس کے ذریعے کی جاتی ہے۔ یہ عمل صرف قومی فوڈ سیکیورٹی کے محدود مقصد کے تحت ہونا چاہیے، اور سماجی فلاحی پالیسیوں، کسانوں کی آمدنی بڑھانے یا بنیادی اشیاء پر بغیر ہدف سبسڈی فراہم کرنے کے طور پر استعمال نہیں ہونا چاہیے؛ (ii) سبسڈیز کی شکل میں کم لاگت قرضے اور دیگر رعایتیں فراہم کی گئیں، جو اگرچہ مختلف صنعتوں کے لیے مختلف تھیں، لیکن ان کے نتیجے میں پاکستان میں فنانسنگ اور ٹیکسز کا ماحول ہم پلہ معیشتوں یا کم مراعات یافتہ شعبوں کی نسبت زیادہ فائدہ مند ہو گیا۔

ٹیکس نظام کو بڑے پیمانے پر غیر شفاف مراعات کی فراہمی کے لیے استعمال کیا گیا، جیسا کہ رئیل اسٹیٹ، زراعت، صنعت اور توانائی کے شعبوں کو دی گئی ٹیکس چھوٹ، نیز اسپیشل اکنامک زونز (ایس ای زیڈز) کے قیام میں اضافے کے ذریعے۔ اس بات پر اتفاق کیا گیا ہے کہ ان سبسڈیز اور ایس ای زیڈز کو مرحلہ وار ختم کیا جائے گا، اور امیر زمینداروں کی آمدنی پر یکم جولائی 2025 سے (موثر از یکم جنوری 2025) ٹیکس عائد کیا جائے گا؛ (iii) حکومت کی جانب سے قیمتوں کے تعین میں مداخلت، جن میں ایندھن، بجلی اور گیس (سال میں دو بار) شامل ہیں، اور ساتھ ہی زیادہ ٹیرف اور نان-ٹیرف تحفظ نے مخصوص گروپوں یا شعبوں کو فائدہ پہنچایا۔ ان تمام سپورٹ اقدامات کے باوجود، کاروباری شعبہ ترقی کا محرک بننے میں ناکام رہا، اور یہ مراعات بالآخر مسابقت کو کمزور کرنے اور وسائل کو غیر مؤثر، ناکام اور مستقل ”نو آموز“ صنعتوں میں پھنسا دینے کا سبب بنیں۔

اگرچہ آئی ایم ایف کی ٹیم کا زور زراعت اور صنعت میں اشرافیہ کے قبضے کو ختم کرنے پر ہے، مگر اس حقیقت کو نظرانداز کیا جا رہا ہے کہ ان اصلاحات کی قیمت اب تک عام عوام نے ادا کی ہے — جن میں شامل ہے۔ یوٹیلیٹی چارجز میں اضافہ (تاکہ لاگت کی مکمل وصولی کا مقصد حاصل کیا جا سکے)؛ بالواسطہ ٹیکسوں پر انحصار، جو کہ مجموعی ٹیکس محصولات کا 70 تا 75 فیصد ہیں اور جن کا بوجھ امیروں کے مقابلے میں غریبوں پر زیادہ پڑتا ہے؛ تنخواہ دار طبقے پر بلند شرح ٹیکس، جو پہلے ہی براہ راست ٹیکسوں کا بڑا حصہ ادا کر رہا ہے؛ اور سب سے بڑھ کر، پٹرولیم لیوی جیسے آسانی سے جمع ہونے والے بالواسطہ ٹیکس پر انحصار میں اضافہ۔ اگرچہ آئی ایم ایف نے بینظیر انکم سپورٹ پروگرام (بی آئی ایس پی) میں اضافہ کی ضرورت پر زور دیا ہے، لیکن اس مد میں کل موجودہ اخراجات کا صرف 3 فیصد ہی مختص کیا گیا ہے، حالانکہ ورلڈ بینک کے مطابق ملک میں غربت کی شرح 42.4 فیصد ہے، جبکہ آزاد ماہرین معاشیات کے مطابق یہ شرح 44 فیصد ہے۔

آئی ایم ایف تجویز دے رہا ہے کہ حکومت پاور سیکٹر اور بنیادی خوراک پر دی جانے والی سبسڈیز کو بی آئی ایس پی کے ذریعے فراہم کرے، جس نے سائنسی بنیادوں پر مستحقین کی شناخت کی ہے۔ تاہم، اس منتقلی کا عمل سست ہے، اور توقع ہے کہ آئی ایم ایف اپنے پروگرام کے خامیوں کا جائزہ لے گا اور مندرجہ ذیل اقدامات پر زور دے گا: (i) پنشن اصلاحات، خصوصاً ان ملازمین کی شراکت کا آغاز جن کی تنخواہیں اور بعد از ملازمت پنشن عوام کے ٹیکس سے ادا کی جاتی ہیں — جو کہ مجموعی افرادی قوت کا 7 فیصد ہیں؛ (ii) موجودہ اخراجات میں تقریباً 2 ہزار ارب روپے کی بڑی کٹوتی، جو موجودہ مالی سال کے بجٹ میں شامل کی گئی رقم سے کم ہو — اس میں تنخواہوں میں جمود، افرادی قوت میں کمی، اور آپریٹنگ اخراجات کو محدود کرنا شامل ہے؛ (iii) غیر ٹیکس محصولات کے لیے حقیقت پسندانہ اعداد و شمار فراہم کرنا، کیونکہ یہ قابل تقسیم ٹیکس آمدنی کا حصہ نہیں ہوتے، اور اسٹیٹ بینک آف پاکستان کے منافع کو بڑھا چڑھا کر پیش کرنے اور ٹیکس خسارے کی صورت میں پٹرولیم لیوی بڑھانے کا ذریعہ بنتے ہیں۔ واضح رہے کہ رواں سال کے ابتدائی 10 ماہ میں ٹیکس آمدن کا خسارہ بجٹ اندازوں سے 833 ارب روپے رہا؛ (iv) پبلک سیکٹر ڈویلپمنٹ پروگرام (پی ایس ڈی پی) کو حقیقت پر مبنی بنانا، جسے ہر سال کے آخر میں بجٹ خسارہ کم کرنے کے لیے کاٹ دیا جاتا ہے؛ (v) مجموعی محصولات میں براہ راست ٹیکسوں کا حصہ بڑھانا، اور بالواسطہ ٹیکسوں پر انحصار کم کرنا۔

چونکہ حکومت نے اب تک ساختی اصلاحات میں تاخیر کی پالیسی برقرار رکھی ہے، اور اس کا بوجھ عام عوام پر منتقل کیا ہے، لہٰذا آئی ایم ایف کے لیے ضروری ہے کہ وہ اپنے پروگرام کے ڈیزائن میں تبدیلی کی کوشش کرے — ایسی تبدیلی جو بوجھ عوام سے ہٹا کر اشرافیہ پر منتقل کرے، خواہ وہ حکومت میں ہوں یا نجی شعبے میں۔

کاپی رائٹ بزنس ریکارڈر، 2025