ڈالر کے مقابلے روپے کی قدر میں10 پیسے کمی

انٹربینک مارکیٹ میں منگل کو ڈالر کے مقابلے روپے کی قدر میں 0.04 فیصد کی کمی ریکارڈ کی گئی۔

کاروبار کے اختتام پر ڈالر کے مقابلے روپیہ 10 پیسے کی تنزلی سے 281.67 روپے پر بند ہوا ۔

یاد رہے کہ پیر کو روپیہ 281.57 پر بند ہوا تھا۔

بین الاقوامی سطح پر منگل کو امریکی ڈالر نے اپنی مضبوط پوزیشن برقرار رکھی کیونکہ سرمایہ کاروں نے امریکہ اور چین کے درمیان ٹیرف معاہدے کا خیرمقدم کیا جس کا مقصد دنیا کی دو بڑی معیشتوں کے درمیان تجارتی جنگ کو کم کرنا تھا جو کہ عالمی کساد بازاری کے خدشات کو جنم دے رہی تھی۔

واشنگٹن اور بیجنگ نے پیر کو ایک معاہدے کا اعلان کیا جس کے تحت انہوں نے ایک دوسرے پر عائد کیے گئے بھاری ٹیرف کو 90 دن کے لیے کم کرنے پر اتفاق کیا، جس کے نتیجے میں عالمی مارکیٹوں میں ریلیف کی لہر دوڑ گئی، جس نے عالمی اسٹاکس کو اوپر پہنچایا اور امریکی ڈالر کو بڑھا دیا۔

کرنسیوں کی باسکٹ کے مقابلے میں امریکی ڈالر ایک ماہ کی بلند ترین سطح کے قریب ٹریڈ کر رہا تھا اور آخری بار 101.67 پردیکھا گیا۔

امریکہ اور چین کے درمیان تجارتی کشیدگی میں کمی کے نتیجے میں تاجروں نے فیڈرل ریزرو کی شرح سود میں کٹوتیوں کے امکانات کو کم کیا ہے، کیونکہ ان کا خیال ہے کہ پالیسی سازوں پر ترقی کی حمایت کے لیے مانیٹری پالیسی کو نرم کرنے کا دباؤ کم ہوگا۔