شوبز شخصیات کی بھارتی جارحیت کی شدید مذمت

پاکستان کی مشہور شخصیات فاطمہ بھٹو، ماہرہ خان اور فواد خان نے پاکستان پر شرمناک بھارتی میزائل حملوں کی شدید مذمت کی اور شہید ہونے والے شہریوں کے لیے دعا کی۔

واضح رہے کہ بھارت نے بدھ کی علی الصباح نیلم جہلم ہائیڈرو پاور پراجیکٹ سمیت بہاولپور، کوٹلی اور مظفر آباد شہروں پر میزائل حملے کیے تھے۔

پاکستان اور آزاد کشمیر میں کم از کم 26 افراد شہید اور 45 زخمی ہوچکے ہیں۔

جوابی کارروائی میں پاکستان نے 5 بھارتی طیارے مار گرائے۔ ڈی جی آئی ایس پی آر کا کہنا تھا کہ لائن آف کنٹرول پر بھارتی بریگیڈ ہیڈ کوارٹر اور چیک پوسٹ کو بھی تباہ کردیا ہے۔

سوشل میڈیا صارفین نے ایکس اور انسٹاگرام پر بھرپور قومی جذبے کا اظہار کیا، جہاں بھارتی فوج کے آپریشن سندور کے جواب میں پاکستانی صارفین کا ہیش ٹیگ آپریشن تندور تیزی سے ٹرینڈ کرنے لگا۔

شوبز اور ادبی حلقوں کی شخصیات نے عام شہریوں پر حملے کی شدید مذمت کی۔

مصنفہ فاطمہ بھٹو نے معصوم شہریوں پر حملے کی مذمت کرتے ہوئے سوال اٹھایا: ایسی ریاست کیسی ہوتی ہے جو لوگوں کے سوتے وقت متعدد شہری مقامات پر بمباری کرتی ہے؟

اداکارہ ماہرہ خان نے بھارت کے کئی برسوں سے جاری نفرت انگیز بیانیے کو شدید تنقید کا نشانہ بنایا۔

اداکار فواد خان نے شہداء کے اہل خانہ سے تعزیت کا اظہار کرتے ہوئے ان تمام عناصر سے امن کی اپیل کی جو جنگ کی آگ بھڑکا رہے ہیں۔

اداکارہ ماورا حسین نے بھارت کے بزدلانہ حملے کی شدید مذمت کی۔

اداکارہ عروہ حسین نے انسٹاگرام پر لکھا کہ ہم اس وقت کسی جنگی دشمن سے نہیں لڑ رہے! ہم ایک کم ظرف ہمسائے سے نبرد آزما ہیں جس کی سوچ خودپسندی پر مبنی ہے اور جو محض اپنی آنے والی سیاسی مہم کے لیے ایک جعلی پروپیگنڈا ثابت کرنا چاہتا ہے۔

اداکارہ میشی خان نے واقعے کی شدید الفاظ میں مذمت کی ۔

اداکارہ و ماڈل حرا ترین نے لکھا کہ دنیا پہلے ہی سیاست کی وجہ سے نفرت اور تباہی سے جل رہی ہے اور اب یہ ہے۔

اداکارہ منشا پاشا نے امن کے لیے دعا کی۔