بھارتی میزائل حملے، ترکیہ کا پاکستان کے ساتھ یکجہتی کا اظہار

ترکیہ نے بھارت کی جانب سے پاکستان کی خودمختاری کی بلا اشتعال خلاف ورزی اور بے گناہ جانوں کے المناک ضیاع کے تناظر میں پاکستان کے ساتھ اپنی بھرپور یکجہتی کا اظہار کیا ہے۔

یہ بات ترکیہ کے سفیر نے نائب وزیراعظم اور وزیر خارجہ اسحاق ڈار سے ملاقات کے دوران کہی۔

دونوں فریقین نے علاقائی سلامتی کے خدشات پر تفصیلی تبادلہ خیال کیا اور قریبی تعاون کو برقرار رکھنے کے عزم کا اعادہ کیا۔

واضح رہے کہ گزشتہ روز پاکستان کے اندر 6 مقامات پر بھارتی میزائل حملوں میں 8 پاکستانی شہید اور 35 زخمی ہوگئے تھے۔

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے پریس کانفرنس کرتے ہوئے کہا کہ بھارتی میزائل بہاولپور، کوٹلی اور مظفر آباد سمیت مختلف مقامات پر داغے گئے۔

اس حملے کے بعد پاکستانی فوج نے بھارتی فضائیہ کے پانچ طیارے مار گرائے تھے۔

پاکستان اور بھارت کے درمیان کشیدگی میں 22 اپریل کو مقبوضہ کشمیر کے علاقے پہلگام میں ہونے والے حملے کے بعد تیزی سے اضافہ ہوا تھا۔

بھارت نے ثبوت پیش کیے بغیر اس حملے کا الزام پاکستان پر عائد کیا تھا، تاہم اسلام آباد نے اس دعوے کو سختی سے مسترد کرتے ہوئے اس کی آزادانہ تحقیقات کا مطالبہ کیا تھا۔

اس کے بعد کے دنوں میں دونوں ممالک ہائی الرٹ کی حالت میں چلے گئے۔ پاکستان نے ممکنہ دراندازی کی پیش گوئی کرتے ہوئے سرحد پر اپنی فوجی موجودگی کو مضبوط کیا۔ دریں اثنا، بھارتی قیادت نے اپنی مسلح افواج کو آپریشنل آزادی دے دی، جس سے کشیدگی میں اضافے کا خدشہ مزید بڑھ گیا۔

نتائج پر قابو پانے کے لئے بیک چینل سفارتی کوششوں کے باوجود ، تناؤ زیادہ رہا۔

پاکستانی فوج نے کسی بھی جارحیت کا فوری جواب دینے کی وارننگ دی تھی جبکہ نئی دہلی نے اشارہ دیا تھا کہ وہ سرحد پار سے پیدا ہونے والے دہشت گردی کے خطرات پر کارروائی کرنے سے نہیں ہچکچائے گا۔